មេដឹកនាំជាប់ឆ្នោតរបស់កោះតៃវ៉ាន់លោក Lai Ching-te នៅព្រហស្បតិ៍ (ទី២៤ ខែមករា) នេះ បាននិយាយថា លោកសង្ឃឹមថា សហរដ្ឋអាមេរិកអាចបន្តគាំទ្រកោះតៃវ៉ាន់យ៉ាងរឹងមាំ ខណៈដែលលោកបានជួបក្រុមសមាជិកសភាអាមេរិកដំបូងគេដែលធ្វើទស្សនកិច្ចនៅទីក្រុងតៃប៉ិ ចាប់តាំងពីលោកបានឈ្នះការបោះឆ្នោតកាលពីដើមខែនេះ។

លោក Lai មកពីគណបក្សប្រជាធិបតេយ្យជឿនលឿន (DPP) ដែលកំពុងកាន់អំណាចរបស់កោះតៃវ៉ាន់ និងជាមេដឹកនាំលំដាប់ទី២បច្ចុប្បន្ន នឹងចូលកាន់តំណែងនៅថ្ងៃទី២០ ខែឧសភា។ ប្រទេសចិនដែលទាមទារថា កោះតៃវ៉ាន់ជាទឹកដីរបស់ខ្លួននោះ ជឿជាក់ថា លោក Lai គឺជាអ្នកបំបែកខ្លួនដ៏គ្រោះថ្នាក់ ហើយបានបដិសេធសំណើចរចារបស់លោក។

អំឡុងជួបជាមួយបណ្ដាមេដឹកនាំនៃសភាតំណាងរាស្ត្រសហរដ្ឋអាមេរិក នៅសភា Caucus របស់កោះតៃវ៉ាន់ តំណាងរាស្រ្តលោក Mario Diaz-Balart និងសមាជិកសភារបស់គណបក្សប្រជាធិបតេយ្យ លោក Ami Bera លោក Lai បាននិយាយថា លទ្ធិប្រជាធិបតេយ្យ និងសេរីភាព គឺជាតម្លៃរួមដ៏សំខាន់ជាមួយសហរដ្ឋអាមេរិក។ លោក Lai បាននិយាយថា៖ «កោះតៃវ៉ាន់ស្ថិតនៅក្នុងខ្សែចង្វាក់កោះទី១ ហើយឈរនៅលើខ្សែបន្ទាត់ជួរមុខនៃការពង្រីកអំណាចផ្តាច់ការរបស់ប្រទេសចិន។ នេះធ្វើឲ្យកោះតៃវ៉ាន់ក្លាយជាទីតាំងយុទ្ធសាស្ត្រដ៏សំខាន់។ ស្ថិរភាពនៅទូទាំងច្រកសមុទ្រតៃវ៉ាន់មានសារៈសំខាន់ខ្លាំងណាស់ ចំពោះសន្តិភាព និងវិបុលភាពក្នុងតំបន់ និងពិភពលោក»។

អមជាមួយនឹងការនិយាយថា លោកនឹងបន្តការពារស្ថានភាពជាក់ស្ដែងឆ្លងកាត់ច្រកសមុទ្រតៃវ៉ាន់ទាំងសន្តិភាព និងស្ថិរភាពនោះ លោក Lai បានបន្ថែមថា៖ «ខ្ញុំសង្ឃឹមថា សហរដ្ឋអាមេរិកអាចបន្តគាំទ្រយ៉ាងរឹងមាំចំពោះតៃវ៉ាន់ ធ្វើឲ្យស៊ីជម្រៅនូវកិច្ចសហប្រតិបត្តិការ និងទំនាក់ទំនងទ្វេភាគី ហើយនិងធ្វើការជាមួយដៃគូប្រជាធិបតេយ្យផ្សេងទៀត ដើម្បីធានាសន្តិភាព និងវិបុលភាពនៅក្នុងតំបន់»។

លោក Diaz-Balart បានប្រាប់លោក Lai ពីសារសំខាន់របស់លោក គឺថា ការគាំទ្ររបស់សហរដ្ឋអាមេរិកចំពោះកោះតៃវ៉ាន់ គឺរឹងមាំ ពិតប្រាកដ និង «១០០ភាគរយពីគណបក្សទាំង២»។

សូមបញ្ជាក់ថា សហរដ្ឋអាមេរិក គឺជាអ្នកគាំទ្រអន្តរជាតិ និងជាអ្នកលក់អាវុធដ៏សំខាន់បំផុតរបស់កោះតៃវ៉ាន់ បើទោះបីជាគ្មានទំនាក់ទំនងការទូតផ្លូវការក៏ដោយ។ ប្រទេសចិនបានព្រមានអាមេរិកម្តងហើយម្តងទៀតឲ្យបញ្ឈប់ការគាំទ្ររបស់ខ្លួនចំពោះតៃវ៉ាន់ ហើយបញ្ហានេះ គឺជាការរំខានឥតឈប់ឈរ ក្នុងទំនាក់ទំនងចិន-អាមេរិក៕