សភាតំណាងរដ្ឋ Florida កាលពីថ្ងៃពុធ (ទី២៤ ខែមករា) បានអនុម័តសេចក្ដីស្នើច្បាប់ដែលមានគោលបំណងរារាំងពួកកុមារអាយុ ១៦ឆ្នាំ និងក្មេងជាងនេះមិនឲ្យចូលទៅប្រើប្រាស់វេទិកាបណ្ដាញសង្គម បន្ទាប់ពីមានសកម្មភាពស្រដៀងគ្នា នៅក្នុងរដ្ឋមួយចំនួន ដើម្បីទប់ស្កាត់ហានិភ័យតាមអ៊ីនធឺណិតចំពោះក្មេងៗវ័យជំទង់។

ដោយទទួលបានការអនុម័តពីសមាជិកគណបក្សទាំង២ ជាមួយនឹងសំឡេងឆ្នោត ១០៦ទល់នឹង១៣ វិធានការនេះនឹងតម្រូវឲ្យវេទិកាបណ្ដាញសង្គមលុបចោលគណនីរបស់អ្នកណាម្នាក់ ដែលមានអាយុក្រោម ១៧ឆ្នាំ និងប្រើប្រាស់ប្រព័ន្ធផ្ទៀងផ្ទាត់ភាគីទី៣ ដើម្បីពិនិត្យមើលកុមារមិនទាន់គ្រប់អាយុ។

សេចក្ដីស្នើច្បាប់នេះក៏នឹងតម្រូវឲ្យក្រុមហ៊ុនលុបជាអចិន្ត្រៃយ៍នូវព័ត៌មានផ្ទាល់ខ្លួន ដែលប្រមូលបានពីគណនីដែលត្រូវបានបិទ ហើយអនុញ្ញាតឲ្យឪពុកម្តាយនាំយកបណ្តឹងរដ្ឋប្បវេណីប្រឆាំងនឹងអ្នកដែលមិនធ្វើដូច្នេះ។ នេះឥឡូវច្បាប់នូវត្រូវបានបញ្ជូនទៅព្រឹទ្ធសភារដ្ឋ Florida ដើម្បីពិចារណា។

អ្នកគាំទ្របាននិយាយថា វិធានការនេះ គឺចាំបាច់ដើម្បីការពារកុមារពីការមានជំងឺធ្លាក់ទឹកចិត្ត ការថប់បារម្ភ និងបញ្ហាសុខភាពផ្លូវចិត្តផ្សេងទៀតដែលពួកគេនិយាយថា មានពាក់ព័ន្ធនឹងទៅនឹងការប្រើប្រាស់បណ្ដា្សង្គមហួសហេតុពេក ដែលអ្នករិះគន់ចំពោះទិដ្ឋភាពដ៏គួរឲ្យញៀនរបស់បណ្ដាញសង្គមនេះ និយាយថា ធ្វើឲ្យកុមារងាយរងគ្រោះជាពិសេស។

ក្រុមអ្នកប្រឆាំងជំទាស់ថា សេចក្ដីស្នើច្បាប់នេះដើរហួសឆ្ងាយ ដោយមានការជំរុញឲ្យមានវិធានការរឹតត្បិតតិចតួច ដូចជាការអនុញ្ញាតឲ្យឪពុកម្តាយជ្រើសរើសចូល ឬមិនអនុញ្ញាតឲ្យកូនៗរបស់ពួកគេប្រើប្រាស់បណ្ដាញសង្គមជាដើម។ Meta ដែលជាក្រុមហ៊ុនមេរបស់បណ្ដាញសង្គម Instagram និង Facebook បានជំទាស់នឹងច្បាប់នេះ ដែលជាធម្មតាហៅថា HB1 ដោយនិយាយថា វានឹងកម្រិតឆន្ទានុសិទ្ធិរបស់មាតាបិតា និងបង្កើនការព្រួយបារម្ភអំពីឯកជនភាពទិន្នន័យ៕