ប្រទេសកាតាបាននិយាយ កាលពីថ្ងៃពុធ (ទី២៤ ខែមករា) ថា ខ្លួនមានការ «ហួសចិត្ត» ជាមួយនឹងការលើកឡើងដែលត្រូវបានសន្មតថា ជាសម្ដីរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ដែលធ្វើការចោទប្រកាន់តាមរយៈខ្សែអាត់សំឡេង ដោយលោកហៅតួនាទីរបស់ប្រទេសអារ៉ាប់រ៉ួម ក្នុងនាមជាអ្នកសម្រុះសម្រួលក្នុងសង្គ្រាម នៅតំបន់ហ្កាហ្សាថា «មានបញ្ហា»។

បើយោងតាមសារព័ត៌មានអ៊ីស្រាអែល Channel 12 បានឲ្យដឹងថា នៅក្នុងកិច្ចប្រជុំមួយ ក្នុងសប្តាហ៍នេះជាមួយក្រុមគ្រួសារចំណាប់ថ្នូរនៅតំបន់ហ្កាហ្សា លោក Netanyahu បានបន្ទោសប្រទេសកាតាថា បានផ្តល់ហិរញ្ញប្បទានដល់ក្រុមហាម៉ាស ហើយបាននិយាយថា លោកមានការខកចិត្ត ចំពោះការសម្រេចរបស់សហរដ្ឋអាមេរិក ក្នុងការពង្រីកវត្តមានមូលដ្ឋានយោធា នៅក្នុងរដ្ឋឈូងសមុទ្រ។

ប្រទេសកាតា រួមជាមួយនឹងអេហ្ស៊ីប និងសហរដ្ឋអាមេរិក គឺជាអ្នកសម្របសម្រួលមួយនៃកិច្ចព្រមព្រៀងបទឈប់បាញ់រយៈពេល ១សប្តាហ៍ ក្នុងខែវិច្ឆិកា ដែលនាំទៅដល់ការដោះលែងចំណាប់ថ្នូរ ១០៥នាក់។

ក្នុងការខ្សែអាត់សំឡេងដែលទទួលបានដោយប្រព័ន្ធផ្សព្វផ្សាយ Channel 12 លោក Netanyahu បាននិយាយថា៖ «អ្នកមិនបានឮខ្ញុំអរគុណកាតាទេ ដែលសំខាន់មិនមានអ្វីខុសពីអង្គការសហប្រជាជាតិ ឬកាកបាទក្រហម ហើយថែមទាំងមានបញ្ហាទៀត។ ខ្ញុំគ្មានការបំភ័ន្តទាក់ទងនឹងពួកគេទេ។ ពួកគេមានមធ្យោបាយដាក់សម្ពាធលើក្រុមហាម៉ាស។ ហើយហេតុអ្វីមិនធ្វើ? ដោយសារតែពួកគេផ្តល់ហិរញ្ញប្បទានដល់ពួកគេ»។ លោកបានបន្ថែមថា នោះហើយ ទើបលោកមានការ «ខឹងសម្បាខ្លាំងណាស់» ចំពោះការសម្រេចចិត្តរបស់ទីក្រុងវ៉ាស៊ីនតោនក្នុងការបន្តកិច្ចព្រមព្រៀងមូលដ្ឋានរបស់ខ្លួនជាមួយកាតា។

ក្នុងសេចក្តីថ្លែងការណ៍មួយដែលត្រូវបានបង្ហោះនៅលើវេទិកាបណ្ដាញសង្គម X អ្នកនាំពាក្យក្រសួងការបរទេសកាតា លោក Majed Al Ansari បាននិយាយថា ប្រទេសរបស់លោក «មានការហួសចិត្តយ៉ាងខ្លាំងចំពោះការលើកឡើងដែលត្រូវបានចោទប្រកាន់ដោយនាយករដ្ឋមន្ត្រីអ៊ីស្រាអែលនេះ»។ កាតានៅតែចូលរួមក្នុងកិច្ចពិភាក្សា ដែលមានគោលបំណងធានាឲ្យមានកិច្ចព្រមព្រៀងចំណាប់ថ្នូរថ្មី ហើយលោក Ansari បាននិយាយថា ការកត់សម្គាល់របស់លោក Netanyahu គឺធ្វើឲ្យប៉ះពាល់ដល់កិច្ចខិតខំប្រឹងប្រែងទាំងនោះ៕