មន្ត្រីអ៊ីស្រាអែលប៉ាន់ប្រមាណថា ក្រុមហាម៉ាសទទួលបានពី ៨ លានដុល្លារទៅ ១២ លានដុល្លារក្នុងមួយខែតាមរយៈការបរិច្ចាគតាមអ៊ីនធឺណិត ដែលភាគច្រើនតាមរយៈអង្គការដែលជាអង្គការសប្បុរសធម៌ ដើម្បីជួយជនស៊ីវិល នៅតំបន់ហ្កាហ្សា។

ចំនួននោះ នឹងស្មើនឹងការកើនឡើងច្រើនដងសម្រាប់ការផ្តល់មូលនិធិតាមអ៊ីនធឺណិត បើប្រៀបធៀបទៅនឹងអ្វីដែលក្រុមនេះ កំពុងទទួលបានមុនពេលការវាយប្រហាររបស់ខ្លួនលើអ៊ីស្រាអែល នៅថ្ងៃទី៧ ខែតុលា នេះបើយោងតាមមន្ត្រីជាច្រើននៅការិយាល័យជាតិសម្រាប់ហិរញ្ញប្បទានប្រឆាំងភេរវកម្មរបស់អ៊ីស្រាអែល។ ពួកគេទាំងអស់បាននិយាយទៅកាន់សារព័ត៌មាន Bloomberg ក្នុងលក្ខខណ្ឌមិនបញ្ចេញឈ្មោះ ដោយលើកឡើងពីភាពរសើបនៃការងាររបស់ពួកគេ។

មន្ត្រីជាន់ខ្ពស់អាមេរិកម្នាក់ បាននិយាយថា ទីក្រុងវ៉ាស៊ីនតោន ក៏ជឿជាក់ផងដែរថា ក្រុមហាម៉ាសទទួលបានមូលនិធិដ៏សំខាន់ពីគេហទំព័រផ្តល់អំណោយតាមអ៊ីនធឺណិត ហើយខ្លួនត្រូវបានប្តេជ្ញាចិត្តជួយអ៊ីស្រាអែលបញ្ឈប់បញ្ហានេះ ។

មន្ត្រីទាំងអស់ បាននិយាយថា ការតាមដាន និងកំណត់បរិមាណនៃការរៃអង្គាសមូលនិធិរបស់ក្រុមហាម៉ាស គឺពិបាក ពីព្រោះក្រុមនេះមានបទពិសោធន៍ជាច្រើនឆ្នាំក្នុងការទទួលបានទណ្ឌកម្មផ្នែកហិរញ្ញវត្ថុ និងឧបករណ៍ផ្សេងទៀត ដែលត្រូវបានរៀបចំឡើង ដើម្បីរារាំង ឬរឹតបន្តឹងលទ្ធភាពទទួលបានប្រាក់។