សារព័ត៌មាន Bloomberg ចេញផ្សាយកាលពីថ្ងៃទី២៤ ខែមករាថា លោក Martin Herem មេបញ្ជាការកងកម្លាំងការពារជាតិអេស្តូនី បាននិយាយថា អង្គការណាតូ បានមើលស្រាលសមត្ថភាពរបស់រុស្ស៊ីក្នុងការផ្គត់ផ្គង់សង្រ្គាមរបស់ខ្លួន ក្នុងប្រទេសអ៊ុយក្រែន ហើយការផលិតគ្រាប់កាំភ្លើងធំរបស់រុស្ស៊ី គឺលើសពីកិច្ចខិតខំប្រឹងប្រែងរបស់អឺរ៉ុបឆ្ងាយណាស់។ 

សហភាពអឺរ៉ុប បានសន្យាក្នុងខែមីនាឆ្នាំ ២០២៣ ក្នុងការប្រគល់គ្រាប់កាំភ្លើងធំមួយលានគ្រាប់ទៅកាន់អ៊ុយក្រែន នៅខែមីនា ឆ្នាំ២០២៤ ប៉ុន្តែនៅខែវិច្ឆិកា ឆ្នាំ ២០២៣ រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយថា ការបញ្ជូននេះ គឺហួសលើសកាលវិភាគ។

ប្រធានទីផ្សារផ្ទៃក្នុងរបស់សហភាពអឺរ៉ុប លោក Thierry Breton បាននិយាយកាលពីថ្ងៃទី២០ ខែមករាថា EU នឹងអាចផលិតបានប្រហែល ១,៣ ទៅ ១,៤ លានគ្រាប់ នៅចុងឆ្នាំ ២០២៤ ហើយនឹងបន្តបង្កើនផលិតកម្ម «គួរឲ្យកត់សម្គាល់» នៅឆ្នាំក្រោយ។

ថ្លែងទៅកាន់សារព័ត៌មាន Bloomberg ពីទីក្រុង Tallinn លោក Herem បាននិយាយថា លោកខាងលិចបានប៉ាន់ប្រមាណថា រុស្ស៊ីអាចផលិតគ្រាប់កាំភ្លើងធំបានមួយលានគ្រាប់ក្នុងមួយឆ្នាំ ប៉ុន្តែការស៊ើបការណ៍សម្ងាត់បង្ហាញថា ប្រទេសនេះ មានសមត្ថភាពផលិត «លើសពីនេះច្រើនដងទៅទៀត»។

លោក Herem បាននិយាយថា ការព្យាករណ៍ថា កងកម្លាំងរុស្ស៊ី នឹងឈានដល់ដែនកំណត់នៃធនធានរបស់ពួកគេមិនទាន់សម្រេចបានឡើយ ហើយអង្គការណាតូ បានមើលស្រាលធនធាន និងបុគ្គលិកដែល   រុស្ស៊ីមានក្នុងការគ្រប់គ្រងរបស់ខ្លួន។