ការព្រមានសុខភាពពីក្រសួងចំណីអាហាររបស់ប្រទេសកូរ៉េខាងត្បូង បានដាស់តឿនប្រជាជនកុំឲ្យបរិភោគឈើចាក់ធ្មេញបំពងដែលធ្វើពីម្សៅ ក្នុងលក្ខណៈស្រដៀងនឹងដំឡូងបំពង បន្ទាប់ពីការធ្វើបែបនេះបានរាលដាលពេញបណ្តាញសង្គមយ៉ាងឆាប់រហ័ស។

ឃ្លីបវីដេអូដែលបង្ហាញឲ្យឃើញពីអ្នកទទួលទានឈើចាក់ធ្មេញម្សៅបំពងខ្លាញ់ជាមួយគ្រឿងទេស ដូចជាម្សៅឈីសជាដើម ទទួលបានការចុចចូលចិត្ត (Like) និងចែកចាយ (Share) រាប់ពាន់នាក់ នៅលើបណ្ដាញ TikTok និង Instagram។

តាមរយៈការបង្ហោះ កាលពីថ្ងៃពុធ (២៤ មករា) នៅលើបណ្ដាញសង្គម X (ពីមុនជា Twitter) ក្រសួងសុវត្ថិភាពចំណីអាហារ និងឱសថ បានឲ្យដឹងថា៖ «សុវត្ថិភាព ក្នុងការអាចយកមកធ្វើជាចំណីអាហារនោះ មិនត្រូវបានបញ្ជាក់អះអាងទេ។ សូមកុំបរិភោគ (អាហារនេះ) អី»។

ក្រសួងបានបន្ថែមថា វីដេអូនៃឈើចាក់ធ្មេញ ដែលជាផលិតផលអនាម័យ ដែលត្រូវបានចៀនបំពងក្នុងប្រេង និងបរិភោគនោះ កំពុងរាលដាលយ៉ាងឆាប់រហ័សក្នុងបណ្ដាញសង្គម។ ការលាបពណ៌អាហារត្រូវបានប្រើប្រាស់ដើម្បីឲ្យលាំៗពណ៌បៃតងចំពោះឈើចាក់ធ្មេញ ដែលធ្វើពីដំឡូង ឬម្សៅពោត ដែលត្រូវបានគេចាត់ទុកថា មិនប៉ះពាល់ដល់បរិស្ថាន និងអាចបំប្លែងសារធាតុជីវគីមីបាន។

កម្មវិធីញ៉ាំអាហារតាមអ៊ីនធឺណិត ឈ្មោះថា «Mukbang» ដែលជារឿយៗបង្ហាញពីមនុស្សបរិភោគអាហារច្រើនហួសប្រមាណ ឬមុខម្ហូបប្លែកៗ កំពុងតែពេញនិយមនៅក្នុងប្រទេសកូរ៉េខាងត្បូង។ អ្នកប្រើប្រាស់បណ្ដាញសង្គម TikTok ម្នាក់ បាននិយាយនៅក្នុងវីដេអូនេះថា «វាស្រួយល្អណាស់» ខណៈកំពុងទំពារឈើចាក់ធ្មេញបំពងនោះគ្រួបៗ៕