ប្រភពមួយ នៅថ្ងៃព្រហស្បតិ៍ (ទី២៥ ខែមករា) នេះ បានប្រាប់ឲ្យដឹងថា តុលាការនៅសហភាពមីយ៉ាន់ម៉ាដែលគ្រប់គ្រងដោយរបបយោធាបានដាក់ឲ្យដេញថ្លៃផ្ទះវីឡាដែលអតីតមេដឹកនាំ និងជាមេដឹកនាំប្រជាធិបតេយ្យលោកស្រី Aung San Suu Kyi (អ៊ុងសាន ស៊ូជី) បានចំណាយពេលរស់នៅ ១៥ឆ្នាំ ក្រោមការឃុំខ្លួនក្នុងផ្ទះ ហើយបានកំណត់ចាប់ផ្តើមដេញថ្លៃក្នុងតម្លៃ ៣១៥ពាន់លានគីយ៉ាត់ (៩០លានដុល្លារអាមេរិក)។

អ្នកស្រី ស៊ូជី ដែលត្រូវស្ថិតក្នុងការឃុំខ្លួនវិញ ចាប់តាំងពីយោធាបានផ្ដួលរំលំរដ្ឋាភិបាលរបស់អ្នកស្រី ក្នុងឆ្នាំ២០២១ ត្រូវបានជាប់ពាក់ព័ន្ធក្នុងជម្លោះផ្លូវច្បាប់អស់រយៈពេលជាច្រើនទសវត្សរ៍ជាមួយនឹងប្អូនប្រុសរបស់អ្នកស្រី ជុំវិញកម្មសិទ្ធិលើវីឡាជាប់មាត់បឹង។

បុគ្គលម្នាក់ដែលដឹងពីដំណើរការដាក់ដេញថ្លៃនេះ បាននិយាយថា ការដេញថ្លៃដែលតុលាការបង្គាប់ នឹងធ្វើនៅគេហដ្ឋាននេះ នាថ្ងៃទី២០ ខែមីនា។

ម្ចាស់ជ័យលាភីណូបែលត្រូវបានឃុំខ្លួននៅឯលំនៅឋានរចនាប័ទ្មអាណានិគម នៅបឹង Inya របស់ទីក្រុង Yangon រហូតដល់ឆ្នាំ២០១២ នៅពេលដែលលោកស្រីបានផ្លាស់ទៅរដ្ឋធានី Naypyitaw ដើម្បីចូលរួមសភា បន្ទាប់ពីត្រូវបានដោះលែង។

លោកស្រី ស៊ូជី នៅតែស្ថិតក្នុងការឃុំឃាំងនៅឡើយទេ ទោះបីជាទីកន្លែងនៅរបស់លោកស្រីមិនត្រូវបានដឹង។ លោកស្រីប្រឈមនឹងការកាត់ទោសឲ្យជាប់ពន្ធនាគាររយៈពេល ២៧ឆ្នាំពីបទល្មើសព្រហ្មទណ្ឌជាច្រើនករណី រាប់ចាប់ពីការក្បត់ជាតិ និងការសូកប៉ាន់ រហូតដល់ការរំលោភច្បាប់ទូរគមនាគមន៍ ជាការចោទប្រកាន់ដែលលោកស្រីបដិសេធ ។ បណ្ដាមេដឹកនាំពិភពលោក និងសកម្មជនគាំទ្រលទ្ធិប្រជាធិបតេយ្យបានអំពាវនាវម្តងហើយម្តងទៀតឲ្យមានការដោះលែងលោកស្រី៕