សៀមរាប៖ យុវជនសង្គមស៊ីវិល នៃសមាគមខ្មែរមហានគរ ដោយមាន​ការចូលរួម​ពី​សំណាក់​ថ្នាក់​ដឹកនាំ ជាមួយរដ្ឋបាលស្រុកបន្ទាយស្រី លោក រិន ឡូត អភិបាល នៃគណៈ​អភិបាល​ស្រុក​បន្ទាយស្រី និងរដ្ឋបាលឃុំ និងនាយកសាលា បឋមសិក្សាតេជោ រុនតាឯក បាន​ប្រកាស​ធ្វើ​កម្ម​វិធី​ចែក​រំលែក​ក្តីស្រឡាញ់ និងស្នាមញញឹម ចែកសៀវភៅ និងដាំកូនឈើ ស្ថិតក្នុង ឃុំរុនតាឯក ស្រុក​បន្ទាយស្រី ខេត្តសៀមរាប។

លោក ហេង សំណាង ប្រធានក្រុមយុវជនសង្គមស៊ីវិលនៃសមាគមយុវជនខ្មែរមហានគរ ដែល​បាន​ចុះ​ទៅ​ដល់តំបន់រុនតាឯក កាលពីថ្ងៃទី២៣ ខែមករា ឆ្នាំ២០២៤នេះ បានឱ្យដឹងថា តំបន់​រុនតាឯក ដោយមានការយកចិត្តទុកដាក់ពីរាជរដ្ឋាភិបាលរួមមានសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា និងសម្ដេចធិបតី ហ៊ុន ម៉ាណែត នាយករដ្ឋមន្រ្ដី នៃ​កម្ពុជា​ ក្នុង​អាណត្តិទី៧នេះ បានយកចិត្តទុកដាក់អភិវឌ្ឍតំបន់រុនតាឯកជារៀងរាល់ថ្ងៃ។ 

លោក​បន្តថា តាមរយៈ​គោល​នយោបាយ​ចំពោះ​ការ​យក​ចិត្ត​ទុក​ដាក់​ដល់​ជីវភាព​របស់​ប្រជាពលរដ្ឋ​ជា​ចំបង​នោះ តំបន់រុនតាឯក បានដោះស្រាយ​ដោយ​ចរីភាព​ចំពោះ​ប្រជាពលរដ្ឋ​ដែល​បាន​ចាក​ចេញ​ពី​តំបន់​អង្គរដោយស្ម័គ្រ្គចិត្ត មករស់នៅតំបន់រុនតាឯក ហើយតំបន់នេះ គឺបានកំពុង​បន្ត​អភិវឌ្ឍ​យ៉ាង​រលូន និងមានការអភិវឌ្ឍន៍យ៉ាងសម្រាក់សម្រាំជារៀងរាល់ថ្ងៃ។

លោកមើល​ឃើញថា តំបន់រុនតាឯក បានរៀបចំនូវហេដ្ឋារចនាសម្ព័ន្ធផ្លូវ ថ្នល់ ប្រព័ន្ធទឹកកខ្វក់ ប្រព័ន្ធ​ទឹកស្អាត បណ្តាញអគ្គិសនី សាលាស្រុក សាលារៀន មន្ទីរពេទ្យ វត្តអារាម ផ្សារ លក់ដូរ និង​ប៉ុស្តិ៍នគរបាលរដ្ឋបាលទៀតផង។

លោក​បញ្ជាក់ថា ដោយអនុវត្តទៅតាមអនុសាសន៍របស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត តំបន់នេះ​បាន​ជំរុញ​ឲ្យ​អភិវឌ្ឍន៍​ឲ្យ​ក្លាយ​ទៅ​ជា​ក្រុង​មួយ​ដ៏​ស្រស់​ស្អាត​របស់​ខេត្ត​សៀមរាប ក្នុងការផ្តល់ភាពងាយស្រួលដល់ប្រជាពលរដ្ឋ និងជាការលើកទឹកចិត្តដល់ប្រជាពលរដ្ឋ ដែល​នៅ​សេសសល់ ក្នុងតំបន់រមណីយដ្ឋានអង្គរ មករស់នៅទីនេះ។ សម្តេចធិបតីហ៊ុន ម៉ាណែន បាន​ផ្តល់​នូវប័ណ្ណសមធម៌ដល់បងប្អូនដែលបានចាកចេញពីតំបន់រមណីយដ្ឋានអង្គរ ក្នុង​រយៈ​ពេល​១០​ឆ្នាំ ដើម្បីទ្រទ្រង់ជីវភាពពេលទៅកាន់ទីតាំងថ្មី ប៉ុន្តែការរៀបចំក្រុងរុនតាឯក ក្នុងជំហាន​ដំបូង​នេះ គឺអាចអនុវត្តនូវឃុំចំនួន ២ គឺឃុំរុនតាឯក របស់ស្រុកបន្ទាយស្រី និងឃុំបល័ង្គ របស់​ស្រុក​ប្រាសាទ​បាគង។

ក្នុងឱកាស​នោះក្រុមយុវជនសង្គមស៊ីវិលនៃសមាគមយុវជនខ្មែរមហានគរ រួមជាមួយរដ្ឋបាល​ស្រុក​បន្ទាយស្រី រដ្ឋបាលឃុំរុនតាឯក និងនាយកសាលាបឋមសិក្សា រុនតាឯក បានប្រកាស​ត្រៀម​រៀប​ចំ​កម្ម​វិធី ការចែករំលែកក្តីស្រឡាញ់ និងស្នាមញញឹម ក្រោមប្រធានបទ ការអប់រំ និងបរិស្ថាន លើក​ទី​១០ ស្ថិតក្នុង ឃុំរុនតាឯក ស្រុកបន្ទាយស្រី ខេត្តសៀមរាប នាពេលឆាប់ៗខាងមុខនេះ។

លោក ហេង សំណាង ក៏បានអំពាវនាវដល់ពលរដ្ឋគ្រប់មជ្ឍមដ្ឋាន ភ្ញៀវទេសចរណ៍ជាតិ អន្តរជាតិ អញ្ជើញ​ទៅទស្សនាផ្ទាល់នៅតំបន់រុនតាឯក ដើម្បីបានជ្រាបកាន់តែច្បាស់ អំពីសមិទ្ធ​ផល​របស់​រាជ​រដ្ឋាភិបាល ដែលបានយកចិត្តទុកដាក់បំផុតក្នុងការអភិវឌ្ឍតំបន់នេះ៕