ប្រទេសកូរ៉េខាងជើង បាននិយាយនៅថ្ងៃសុក្រ (២៦ មករា) នេះថាខ្លួនកំពុងធ្វើជាម្ចាស់ផ្ទះនៃដំណើរទស្សនកិច្ចដោយគណៈប្រតិភូរដ្ឋាភិបាលចិន ដែលដឹកនាំដោយអនុរដ្ឋមន្ត្រីការបរទេស លោក ស៊ុន វ៉ីតុង (Sun Weidong) ខណៈដែលកូរ៉េខាងជើង បន្តកិច្ចខិតខំប្រឹងប្រែងរបស់ខ្លួនក្នុងការពង្រឹងទំនាក់ទំនងជាមួយទីក្រុងប៉េកាំង និងទីក្រុងមូស្គូ ក្នុងការប្រឈមមុខដាក់គ្នាកាន់តែស៊ីជម្រៅជាមួយទីក្រុងវ៉ាស៊ីនតោន។

ទីភ្នាក់ងារសារព័ត៌មានមជ្ឈិមកូរ៉េផ្លូវការ KCNA របស់កូរ៉េខាងជើងបាននិយាយថា គណៈប្រតិភូរបស់លោក ស៊ុន បានទៅដល់រដ្ឋធានីព្យុងយ៉ាង កាលពីថ្ងៃព្រហស្បតិ៍ បន្ទាប់ពីឆ្លងកាត់ព្រំដែនដីគោករវាងប្រទេសទាំងពីរ ប៉ុន្តែរបាយការណ៍នោះមិនបានផ្តល់ព័ត៌មានលម្អិតបន្ថែមអំពីដំណើរទស្សនកិច្ចនេះទេ។

មេដឹកនាំកូរ៉េខាងជើង លោក គីម ជុងអ៊ុន បាននឹងកំពុងព្យាយាមជំរុញភាពមើលឃើញនៃភាពជាដៃគូរបស់ខ្លួនជាមួយចិន និងរុស្ស៊ី ខណៈដែលលោកព្យាយាមបំបែកចេញពីភាពឯកោផ្នែកការទូត និងពង្រឹងការឈរជើងក្នុងតំបន់ដោយចូលរួមរណសិរ្សរួបរួមប្រឆាំងនឹងសហរដ្ឋអាមេរិក។

លោក គីម បានធ្វើដំណើរទៅកាន់តំបន់ចុងបូព៌ារបស់រុស្ស៊ី ក្នុងខែកញ្ញា សម្រាប់កិច្ចប្រជុំកំពូលដ៏កម្រមួយជាមួយប្រធានាធិបតីរុស្ស៊ី លោក វ្លាឌីមៀ ពូទីន (Vladimir Putin) ហើយអ្នកជំនាញមួយចំនួនបាននិយាយថា លោក គីម ក៏ទំនងជាកំពុងស្វះស្វែងរកកិច្ចប្រជុំជាមួយប្រធានាធិបតីចិន លោក ស៊ី ជីនពីង (Xi Jinping) ផងដែរ៕