តាមរយៈកម្មវិធី «វេទិកាការងារ និងកិច្ចសម្ភាសការងារ» ដែលសហការរៀបចំដោយទីភ្នាក់ងារជាតិមុខរបរ និងការងារ (NEA) ជាមួយនឹងសហភាពសហព័ន្ធយុវជនកម្ពុជា វិស័យការងារ និងបណ្តុះបណ្តាលវិជ្ជាជីវៈ គិតក្នុងខែមករា ដើមឆ្នាំ២០២៤នេះ បានកត់សម្គាល់ឃើញថា មានយុវជនជាច្រើនរយនាក់ ទទួលបានលទ្ធផលល្អក្នុងវេទិការងារ និងកិច្ចសម្ភាសន៍ការងារ។
លោក ឆោម សុខឿន ប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិមុខរបរ និងការងារ ក្នុងបទសម្ភាសន៍ជាមួយទូរទស្សន៍ព័ត៌មាន ប៊ីធីវី បានដឹងថា តាមរយៈការរៀបចំកម្មវិធីវេទិកាការងារ និងវេទិកាសម្ភាសន៍ការងារ ដែលរៀបចំឡើងជារៀងរាល់សប្តាហ៍ មើលឃើញថា មានយុវជន សិស្សនិស្សិត អ្នកស្វែងរកការងារធ្វើ បានចូលរួមដាក់ពាក្យ និងសម្ភាសការងារភ្លាមៗជាមួយមន្ត្រីធនធានមនុស្សតំណាងក្រុមហ៊ុននានាជាច្រើនវិស័យ។ ជាលទ្ធផល អ្នកស្វែងរកការងារជាច្រើនរយនាក់ទទួលបានលទ្ធផលល្អ ក្នុងកម្មវិធីខាងលើ។
ពាក់ព័ន្ធវេទិកាការងារ និងកិច្ចសម្ភាសន៍ការងារខាងលើនេះដែរ លោក សុខឿន បានបញ្ជាក់ថា មជ្ឈមណ្ឌលការងាររាជធានី-ខេត្ត នឹងបន្តរៀបចំរៀងរាល់សប្ដាហ៍នៃវេទិកាការងារ និងកិច្ចសម្ភាសការងារនៅខែបន្តបន្ទាប់ទៀត និងរួមមានទាំងវគ្គបណ្ដុះបណ្ដាលជំនាញទន់, វគ្គបណ្ដុះបណ្ដាលការត្រៀមលក្ខណៈសម្បត្តិក្នុងការស្វែងរកការងារ ជូនដល់យុវជន សិស្ស និស្សិត ដោយឥតគិតថ្លៃផងដែរ ដើម្បីអាចទទួលបានការងារធ្វើកាន់តែឆាប់រហ័ស។
លោកស្រី វង វណ្ណារី មន្ត្រីជ្រើសរើសបុគ្គលិកជាន់ខ្ពស់នៃគ្រឹះស្ថានមីក្រូហិរញ្ញវត្ថុ អេអិមខេ (AMK) និងលោក ពេជ្រ រដ្ឋា មន្រ្តីធនធានមនុស្សនៃធនាគារឯកទេស អ៊ីអន ដែលបានសហការជាមួយ NEA ជាច្រើនលើកមកហើយ ក្នុងការជ្រើសរើសបុគ្គលិក បានឲ្យដឹងស្រដៀងគ្នាថា មូលហេតុដែលបន្តសហការជាមួយនឹង NEA ព្រោះបានជួយយ៉ាងច្រើន ក្នុងការផ្សព្វផ្សាយអំពីតម្រូវការជ្រើសរើសបុគ្គលិកជូនដល់សាធារណជន ជាពិសេសបានរួមចំណែកដ៏សំខាន់ ក្នុងការជ្រើសរើសបុគ្គលិកប្រកបដោយគុណភាព និងទាន់តម្រូវការ។
សូមជម្រាបជូនថា វេទិកាការងារ បានរួមចំណែកយ៉ាងសំខាន់ដល់ភាគីនិយោជក ដែលកំពុងមានតម្រូវការជ្រើសរើសបុគ្គលិក ទាំងពេលបច្ចុប្បន្ន និងអនាគត ឲ្យមានឱកាសបានជួបជាមួយអ្នកកំពុងស្វែងរកការងារដោយផ្ទាល់ ដើម្បីយកទៅបំពេញបេសកម្មក្រុមហ៊ុន សហគ្រាស និងសម្រេចផែនការរបស់ភាគីនិយោជក។ វេទិកាការងារនេះដែរ គឺជាផ្នែកមួយនៃយន្តការរបស់រាជរដ្ឋាភិបាល ក្នុងការផ្ដល់ឱកាសដល់សាធារណៈជនទូទៅ ជាពិសេសយុវជនដែលចង់ស្វែងការងារធ្វើ អ្នកស្វែងរកកន្លែងកម្មសិក្សា ឬអ្នកចង់ផ្លាស់ប្តូរការងារ អាចទទួលបានកាន់តែងាយស្រួល ដោយចំណេញពេលវេលា និងនៅមួយកន្លែង៕ អត្ថបទ៖ ឈិត បូរ៉ាវី