នៅថ្ងៃទី២៦ខែមករានេះ ក្រសួងទេសចរណ៍​បាន​បើក​សិក្ខាសាលា​ពិគ្រោះ​យោបល់​រៀបចំ​សេចក្តី​ពា្រង កម្មវិធីបណ្តុះបណ្តាលគុណវុឌ្ឍិជាតិវិជ្ជាជីវៈកម្រិត ២ សញ្ញាបត្រវិជ្ជាជីវៈ C1 លើជំនាញ​ការិយាល័យ​ជួរមុខ និងសេវាកម្មម្ហូបអាហារ និងភេសជ្ជៈ ដែលការរៀបចំ​កម្ម​វិធី​បណ្តុះ​បណ្តាល​ជំនាញ​នេះ នឹងផ្តល់ឱកាសយុវជនគ្មានសញ្ញាបត្រឌីប្លូមជាដើម អាចចូល​សិក្សា​ជំនាញ​ទេសចរណ៍ និង​បន្តសិក្សារហូតដល់សញ្ញាបត្រថ្នាក់បណ្ឌិត។

លោក ជួប រតនា ប្រធាន នាយកដ្ឋានផែនការ អភិវឌ្ឍន៍ទេសចរណ៍ នៃក្រសួងទេសចរណ៍ ថ្លែង​ថា តាមការប្តេជ្ញាចិត្ត ការរៀបចំសេចក្តីពា្រង កម្មវិធីបណ្តុះបណ្តាលគុណវុឌ្ឍិជាតិវិជ្ជាជីវៈកម្រិត ២ សញ្ញា​បត្រវិជ្ជាជីវៈ C1 លើជំនាញការិយាល័យជួរមុខ និងសេវាកម្មម្ហូបអាហារ និងភេសជ្ជៈនេះ គ្រោង​នឹង​រៀបចំបញ្ចប់នៅក្នុងខែកុម្ភៈ ហើយនៅក្នុងខែមីនា ឆ្នាំ២០២៤ នឹងដាក់ស្នើ​សុំ​គណៈកម្មាធិការ​ជាតិ​រៀបចំការបណ្តុះបណ្តាល ក្រសួងការងារ និងបណ្តុះបណ្តាលវិជ្ជាជីវៈ អនុញ្ញាត ដើម្បីផ្តល់បណ្តុះបណ្តាលជំនាញវិជ្ជាជីវៈទេសចរណ៍ ២ មុខជំនាញ នៅក្នុង​កម្ម​វិធី​បណ្តុះ​បណ្តាល​ជំនាញវិជ្ជាជីវៈ និងបច្ចេកទេស ជូនយុវជន ១.៥លាននាក់របស់រាជរដ្ឋាភិបាល ។

លោក ជួប រតនា បន្តថា តាមរយៈការរៀបចំបញ្ចប់កម្មវិធីសិក្សាជំនាញការិយាល័យជួរមុខ និង​សេវា​កម្ម​ម្ហូបអាហារ និងភេសជ្ជៈ ដែលត្រូវទទួលសញ្ញាបត្រវិជ្ជាជីវៈ C1 នេះនឹងបើក​ឱកាស​ឲ្យ​យុវជន​ដែល​មិន​មាន​សញ្ញាបត្រឌីប្លូមជាដើម គឺអាចចូលសិក្សាយកជំនាញ និងបន្ត​ការ​សិក្សា​រហូត​ថ្នាក់​បណ្ឌិត។

ឯកឧត្តម ស្រូ រិទ្ធី ក្នុងនាមជា គ្រូបង្គោលអាស៊ានបានថ្លែងថា បច្ចុប្បន្ន​គ្រប់​យុវជន​ដែល​ទទួល​បាន​ការ​បណ្តុះ​បណ្តាល​ជំនាញវិជ្ជាជីវៈទេសចរណ៍នេះ គឺភាគច្រើនតែងទទួលបានឱកាសច្រើន មាន​ទីផ្សារ​ការងារច្រើន និងខ្លះទទួលបានឱកាសការងារនៅតាមបណ្តាប្រទេសអាស៊ាន និង​ទទួល​បាន​ប្រាក់បៀវត្សខ្ពស់។

សូមបញ្ជាក់ថា បច្ចុប្បន្នបើ​ទោះ​ក្រសួង​ទេសចរណ៍​មិនទាន់​មាន​កម្ម​វិធី​បណ្តុះបណ្តាល​ជំនាញ​ទេសចរណ៍​យក​សញ្ញាបត្រវិជ្ជាជីវៈ C1 ក៏ដោយសង្កេតឃើញថា ក្រសួងទេសចរណ៍​បាន​ផ្តល់​ការ​បណ្តុះ​បណ្តាល​ជំនាញជូនយុវជនរាប់ម៉ឺននាក់ក្នុងវិស័យទេសចរណ៍ និងមានអ្នករៀនខ្លះរៀន​បាន​សញ្ញាបត្រ​វិជ្ជាជីវៈទេសចរណ៍ទទួលស្គាល់ដោយអាស៊ាន និងអាចធ្វើការងារ​ចល័ត​នៅ​ក្នុង​តំប​ន់​អាស៊ាន​ផង​ដែរ​៕ អត្ថបទ៖ ស៊ុម សុខជា