កំពង់ឆ្នាំង៖ នៅថ្ងៃទី២៦ ខែមករា ឆ្នាំ២០២៤នេះ ប័ណ្ណកម្មសិទ្ធិដីធ្លីជាង២ពាន់ក្បាលដី ត្រូវបានមន្រ្តីជំនាញសូរិយោដី ចែកជូនដល់ប្រជាពលរដ្ឋដែលរស់នៅក្នុងភូមិខ្លុងពពក និងភូមិត្រពាំងជ្រៃ ឃុំខ្លុងពពក ស្រុកទឹកផុស ខេត្តកំពង់ឆ្នាំង ធ្វើឲ្យពួកគាត់សប្បាយរីករាយមែនទែន លែងមានការព្រួយបារម្ភចំពោះអ្នកណាមករំលោភបំពានទៀតឡើយ ។ ប័ណ្ណកម្មសិទ្ធិដីជាង២ពាន់ក្បាលដីនេះ បានប្រគល់ជូនប្រជាពលរដ្ឋនៅលាសាបុណ្យត្រពាំងជ្រៃ ភូមិខ្លុងពពក ឃុំខ្លុងពពក ស្រុកទឹកផុស ខេត្តកំពង់ឆ្នាំង ។

 ប្រជាពលរដ្ឋបានអោយដឹងថា៖ កន្លងមកសម្តេចតេជោ ហ៊ុន សែន អតីតនាយករដ្ឋមន្ត្រី បានយកចិត្តទុកដាក់លើសុខទុក្ខប្រជាពលរដ្ឋនៅគ្រប់ទីកន្លែងដោយមិនរើសអើងនិន្នាការអ្វីឡើយ។ មកដល់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏រឹតតែយកចិត្តទុកដាក់ដល់សុខទុក្ខប្រជាពលរដ្ឋទ្វេរឡើង។ នៅក្នុងអាណត្តិរបស់សម្តេចធិបតី លោកបានអោយក្រុមការងារមន្ត្រីសូរិយោដីនៃក្រសួងដែនដី នគរូបនីយកម្ម និងសំណង់ ចុះវាស់វែងក្បាលដីដែលនៅសេសសល់ជូនប្រជាពលរដ្ឋអោយបានលឿន ដើម្បីបញ្ជៀស និងបញ្ចប់នូវរាល់ទំនាស់នានា និងឲ្យប្រជាពលរដ្ឋទទួលបាននូវសិទ្ធិកាន់កាប់ ប្រើប្រាស់ និងបែងចែកដីធ្លី ដោយស្របច្បាប់ ។ 

លោក សុខ សម្បត្តិ ប្រធានក្រុមទី១ចុះបញ្ជីដីធ្លីមានលក្ខណៈជាប្រព័ន្ធ នៃមន្ទីររៀបចំដែនដី នគររូបនីយកម្មសំណង់ និងសូរិយោដីខេត្តកំពង់ឆ្នាំង បានថ្លែងថា៖ ក្រុមការងាររបស់លោក បានសម្រេចប្រគល់ប័ណ្ណជូនប្រជាពលរដ្ឋចំនួន២ឃុំរួចមកហើយ គឺឃុំតាំងក្រសាំង និងឃុំអភិវឌ្ឍន៍ ស្រុកទឹកផុស។ ចំណែកការងារបន្តនេះ គឺកំពុងធ្វើនៅក្នុងឃុំខ្លុងពពក ស្រុកទឹកផុស ហើយសម្រេចចែកប័ណ្ណកម្មសិទ្ធិជូនប្រជាពលរដ្ឋចំនួន២ភូមិហើយដែរ ។ ពេលទទួលបានប័ណ្ណ សូមឲ្យបងប្អូនប្រជាពលរដ្ឋត្រូវចេះថែរក្សាការពារប័ណ្ណកម្មសិទ្ធិដីនេះកុំឲ្យបាត់បង់ និងត្រូវចេះដាំដុះ បង្កបង្កើនផលនៅលើដី នោះឲ្យអស់លទ្ធភាព ដើម្បីបង្កើនជីវភាពរស់នៅកាន់តែប្រសើរ ក្នុងការកាត់បន្ថយភាពក្រីក្រ ជាមួយរាជរដ្ឋាភិបាលកម្ពុជា ។ នេះគឺជាសមិទ្ធិផលថ្មីមួយទៀត បន្ទាប់ពីសមិទ្ធផលនានាជាច្រើនរបស់ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលបានខិតខំប្រឹងប្រែង ក្នុងការកសាងប្លង់សុរិយោដី និងសៀវភៅគោលបញ្ជីដីធ្លីដោយស្របច្បាប់។ 

រាជរដ្ឋាភិបាលបានចំណាយទាំងថវិកា និងធនធានមនុស្ស ចុះធ្វើការវាស់វែង និងប្រមូលទិន្នន័យដីធ្លី តាំងពីបទបញ្ជាលេខ០១ ស្របតាមគោលនយោបាយចាស់ សកម្មភាពថ្មី ក្នុងគោលបំណងឲ្យប្រជាពលរដ្ឋ យើងទទួលបាននូវសិទ្ធិកាន់កាប់ ប្រើប្រាស់ និងបែងចែកដីធ្លី ដោយស្របច្បាប់គ្រប់គ្នាតែម្តង ៕ ដោយ ៖ កាំង ហុងវាស្នា