ប្រទេសកូឡុំប៊ី បានប្រកាសពីស្ថានភាពគ្រោះមហន្តរាយ កាលពីថ្ងៃព្រហស្បតិ៍ (២៥ មករា) ដោយសារចំហេះព្រៃបានឆាបឆេះនៅទូទាំងផ្នែកជាច្រើននៃប្រទេស ខណៈដែលប្រធានាធិបតីបានព្រមានថាស្ថានភាពអាចកាន់តែអាក្រក់ទៅៗ។

ប្រធានាធិបតីរបស់ប្រទេសកូឡុំប៊ី លោក ហ្គាសស្តាវ៉ូ ផេត្រូ (Gustavo Petro) បានប្រកាសពី «ស្ថានភាពនៃគ្រោះមហន្តរាយ និងគ្រោះអាសន្ន» ដោយប្រាប់អ្នកសារព័ត៌មានថា មូលនិធិដែលត្រូវបានអនុម័តពីមុនសម្រាប់គោលបំណងផ្សេងទៀត កំពុងត្រូវបានបញ្ជូនដើម្បីដោះស្រាយវិបត្តិនេះ។

លោកប្រធានាធិបតីរូបនេះបានបន្ថែមថា រដ្ឋាភិបាលក៏កំពុងស្វែងរកជំនួយពីអន្តរជាតិផងដែរ ដោយសហរដ្ឋអាមេរិក ឈីលី ប៉េរូ និងកាណាដា «ដែលមានបទពិសោធន៍យ៉ាងសម្បើមក្នុងការប្រយុទ្ធនឹងចំហេះ» បានឆ្លើយតបទៅនឹងការអំពាវនាវនេះ។

យោងតាមក្រុមមន្ត្រីបានឱ្យដឹងថា ចំហេះព្រៃនេះគឺជាលទ្ធផលនៃអាកាសធាតុក្តៅ និងស្ងួត ដែលទាក់ទងនឹងបាតុភូតអាកាសធាតុ អ៊ែលនីញ៉ូ (El Niño)។ គំរូអាកាសធាតុដ៏ធ្ងន់ធ្ងរនេះត្រូវបានគេរំពឹងថានឹងបន្តប៉ុន្មានខែខាងមុខទៀត មុននឹងបញ្ចប់ក្នុងអំឡុងពេលនិទាឃរដូវអឌ្ឍគោលខាងជើង៕