សារព័ត៌មាន Washington Post បានរាយការណ៍ថា នាយក CIA លោក William Burns មានផែនការជួយសម្របសម្រួលកិច្ចព្រមព្រៀងរវាងអ៊ីស្រាអែល និងក្រុមហាម៉ាស ដែលពាក់ព័ន្ធទៅនឹងការដោះលែងចំណាប់ថ្នូរអ៊ីស្រាអែលទាំងអស់ដែលឃុំខ្លួនដោយក្រុមឥស្លាមនិយម។

កាលពីថ្ងៃព្រហស្បតិ៍ សារព័ត៌មាននេះបានដកស្រង់សម្តីមន្ត្រីរដ្ឋាភិបាលសហរដ្ឋអាមេរិក ដែលនិយាយថាលោក Burns ត្រូវបានគេរំពឹងថានឹងធ្វើដំណើរទៅកាន់សហភាពអឺរ៉ុប នៅប៉ុន្មានថ្ងៃខាងមុខនេះ។ លោកត្រូវបានគេរំពឹងថា នឹងជួបជាមួយប្រមុខចារកម្មអ៊ីស្រាអែល និងអេហ្ស៊ីប ព្រមទាំងនាយករដ្ឋមន្ត្រីប្រទេសកាតា លោក ម៉ូហាម៉េត ប៊ីន អាប់ឌុលរ៉ាម៉ាន អាល់ថានី (Mohammed bin Abdulrahman Al Thani) ។ ប្រមុខរបស់ប្រទេសអេហ្ស៊ីប នឹងសម្របសម្រួលកិច្ចចរចាបទឈប់បាញ់រវាងអ៊ីស្រាអែលនិងក្រុមហាម៉ាស។ ទាក់ទងទៅនឹងជំនួបដែលបានគ្រោងទុក មន្ត្រីអាមេរិកម្នាក់ តាមសេចក្តីរាយការណ៍បានប្រាប់សារព័ត៌មានថា «មានការផ្លាស់ប្តូរយោបល់ និងសំណើគ្រប់គ្រាន់ ដែលយើងនឹងខិតជិតដល់ដំណាក់កាលនៃការចរចាហ្មត់ចត់។ មន្ត្រីជាន់ខ្ពស់សេតវិមាន បាននិយាយថា បេសកជនប្រចាំនៅមជ្ឈិមបូព៌ារបស់សហរដ្ឋអាមេរិក លោក Brett McGurk បានទៅធ្វើទស្សនកិច្ចនៅប្រទេសអេហ្ស៊ីប និងកាតា។

រដ្ឋាភិបាលសហរដ្ឋអាមេរិក មានគោលបំណងបង្កើនកិច្ចខិតខំប្រឹងប្រែងសម្រាប់ការដោះលែងចំណាប់ថ្នូរ ដោយការបញ្ជូនលោក Burns ។ យោធាអ៊ីស្រាអែល និយាយថា ក្រុមហាម៉ាស នៅតែឃុំខ្លួនចំណាប់ថ្នូរជាង ១៣០ នាក់នៅឡើយ។

អាជ្ញាធរសុខាភិបាលតំបន់ហ្កាហ្សា និយាយកាលពីថ្ងៃព្រហស្បតិ៍ថាមនុស្ស ២០០នាក់ ត្រូវបានសម្លាប់ក្នុងរយៈពេល ២៤ ម៉ោងមុន ដែលនាំឱ្យចំនួនអ្នកស្លាប់កើនឡើងដល់ ២៥.៩០០នាក់។