ទីភ្នាក់ងារព័ត៌មាន AP បានរាយការណ៍កាលពីថ្ងៃទី២៥ ខែមករាថា រដ្ឋមន្ត្រីការបរទេសនេប៉ាល់ លោក ណារ៉ាយ៉ាន ប្រាកាស ស៊ូដ (Narayan Prakash Saud) បានជំរុញឲ្យរុស្ស៊ី ផ្តល់សំណងដល់គ្រួសារនៃជនជាតិនេប៉ាល់ ដែលបានស្លាប់ក្នុងសង្គ្រាមប្រឆាំងនឹងអ៊ុយក្រែន។

លោកស៊ូដ បាននិយាយថា ពលរដ្ឋនេប៉ាល់ជាង២០០នាក់ ត្រូវបានជ្រើសរើសដោយប្រទេសរុស្ស៊ី ដើម្បីចូលរួមក្នុងសង្គ្រាម ដោយយ៉ាងហោចណាស់ ១៤ នាក់ ត្រូវបានបញ្ជាក់ថា បានស្លាប់។ ប្រទេសនេប៉ាល់បានអំពាវនាវឲ្យរុស្ស៊ី «បញ្ឈប់ជាបន្ទាន់»នូវការជ្រើសរើសពលរដ្ឋរបស់ខ្លួន និងធ្វើមាតុភូមិនិវត្តន៍អ្នកដែលបម្រើរួចហើយ ក៏ដូចជាអដ្ឋិធាតុនៃអ្នកស្លាប់ជាដើម។

លោករដ្ឋមន្ត្រីរូបនេះ បានថ្លែងថា៖«យើងបានស្នើឲ្យរុស្ស៊ីបញ្ឈប់ជាបន្ទាន់នូវការជ្រើសរើសជនជាតិនេ      ប៉ាល់នៅក្នុងជួរកងទ័ពរបស់ពួកគេ បញ្ជូនអ្នកដែលបានបម្រើក្នុងជួរកងទ័ពរួចហើយ បញ្ជូនសាកសពអ្នកស្លាប់ និងធ្វើមាតុភូមិនិវត្តន៍ភ្លាមៗ និងព្យាបាល និងប្រគល់អ្នករបួស នៅក្នុងការប្រយុទ្ធគ្នានោះ»។

លោកបានបន្ថែមថា ប្រទេសនេប៉ាល់ ក៏រំពឹងថា រុស្ស៊ីនឹងផ្តល់សំណងជារូបិយវត្ថុដល់ក្រុមគ្រួសារនៃជនជាតិនេប៉ាល់ដែលត្រូវបានសម្លាប់ក្នុងការប្រយុទ្ធគ្នា នៅអ៊ុយក្រែន។

ជាចុងក្រោយ លោកស៊ូដ បាននិយាយថា យុទ្ធជននេប៉ាល់ចំនួន៥នាក់ ត្រូវបានចាប់ខ្លួនដោយកងកម្លាំងអ៊ុយក្រែន។

លោកបាននិយាយថា៖«យើងមានព័ត៌មានថា ពលរដ្ឋរបស់យើង ៥នាក់ដែលបានប្រយុទ្ធក្នុងនាមជនជាតិ   រុស្ស៊ី ត្រូវបានចាប់ជាចំណាប់ថ្នូរ ដោយភាគីអ៊ុយក្រែន»។