ប្រធានាធិបតីវ៉េណេហ្ស៊ុយអេឡា លោក Nicolas Maduro (នីកូឡាស ម៉ាឌូរ៉ូ) កាលពីថ្ងៃព្រហស្បតិ៍ (ទី២៥ ខែមករា) បានព្រមានថា កិច្ចព្រមព្រៀងជាមួយក្រុមប្រឆាំងនយោបាយ សម្រាប់ការបោះឆ្នោត ដែលនឹងធ្វើឡើង នៅចុងឆ្នាំនេះ គឺប្រឈមនឹងការដួលរលំ បន្ទាប់ពីមាននូវអ្វីដែលលោកបានពិពណ៌នាថា ជា «ការសមគំនិត» ប្រឆាំងនឹងរូបលោក។

កាលពីឆ្នាំមុន រដ្ឋាភិបាលសង្គមនិយមដែលកំពុងកាន់អំណាចរបស់លោក ម៉ាឌូរ៉ូ បានឈានដល់កិច្ចព្រមព្រៀងជាមួយក្រុមប្រឆាំងនយោបាយ ជុំវិញការពិភាក្សា នៅទីក្រុង Barbados (បាបាដូស) ដើម្បីរៀបចំការបោះឆ្នោត នៅពេលណាមួយក្នុងអំឡុងឆមាសទី២ នៃឆ្នាំនេះ។

កិច្ចព្រមព្រៀងនោះ បានធ្វើឲ្យសហរដ្ឋអាមេរិកបន្ធូរបន្ថយជាបណ្ដោះអាសន្ននូវទណ្ឌកម្មផ្នែកសេដ្ឋកិច្ចលើប្រទេសនាំចេញប្រេងឆៅមួយនេះ។ មន្ត្រីសហរដ្ឋអាមេរិក បានសង្កត់ធ្ងន់ថា ការបន្ធូរបន្ថយគឺពឹងផ្អែកលើការដកបម្រាមលើគូប្រជែង ដែលកាន់តំណែងសាធារណៈ ក៏ដូចជាការដោះលែងអ្នកទោសនយោបាយ និងជនជាតិអាមេរិកដែលត្រូវ «ឃុំខ្លួនដោយអយុត្តិធម៌»។

តែយ៉ាងណាក្ដី វ៉េណេហ្ស៊ុយអេឡា មិនទាន់ដកបម្រាមលើលោកស្រី Maria Corina Machado (ម៉ារៀ កូរីណា ម៉ាចាដូ) ដែលជាបេក្ខភាពប្រធានាធិបតីរបស់គនបក្សប្រឆាំង នៅឡើយទេ។ ហើយក្នុងសប្តាហ៍នេះ លោក ម៉ាឌូរ៉ូ បាននិយាយថា «ការឃុបឃិត» ប្រឆាំងនឹងរូបលោក និងមន្ត្រីរដ្ឋាភិបាលជាន់ខ្ពស់ ត្រូវបានរុះរើ កាលពីឆ្នាំមុន ដោយជនស៊ីវិល និងបុគ្គលិកយោធាជិត ៣០សិបនាក់ ត្រូវបានឃុំខ្លួន។

លោក ម៉ាឌូរ៉ូ បានថ្លែងនៅក្នុងការផ្សាយតាមទូរទស្សន៍រដ្ឋថា៖ «ថ្ងៃនេះកិច្ចព្រមព្រៀងទីក្រុងបាបាដូស រងការប៉ះពាល់យ៉ាងធ្ងន់ធ្ងរ កិច្ចព្រមព្រៀងកំពុងស្ថិតក្នុងការយកចិត្តទុកដាក់យ៉ាងខ្លាំង ដោយអាចត្រូវបានបញ្ចប់ និងទាត់ចោល»។ តែលោកបានបញ្ជាក់បន្ថែមថា៖ «យើងសង្ឃឹមថា អាចជួយសង្គ្រោះកិច្ចព្រមព្រៀងទីក្រុងបាបាដូសបាន តាមរយៈការសន្ទនា និងឈានដល់កិច្ចព្រមព្រៀងដ៏ទូលំទូលាយពិតប្រាកដ តាមរយៈការឯកភាពជាតិ»៕