ការិយាល័យប្រធានាធិបតី បាននិយាយនៅថ្ងៃសុក្រនេះថា ប្រធានាធិបតីកូរ៉េខាងត្បូង លោក Yoon Suk Yeol បានចាត់ទុកការវាយប្រហារដោយអនីតិជនម្នាក់មកលើសមាជិកសភាគណបក្សកាន់អំណាច ក្នុងសប្តាហ៍នេះថា ជាសកម្មភាព «ភេរវកម្ម» ។

សមាជិកសភា លោកស្រី Bae Hyun-jin អាយុ ៤០ ឆ្នាំ ត្រូវបានវាយប្រហារកាលពីថ្ងៃព្រហស្បតិ៍ ដោយអនីតិជនម្នាក់ ដែលបានវាយលោកស្រីម្តងហើយម្តងទៀតចំពីខាងក្រោយក្បាលដោយដុំថ្ម នៅក្នុងសង្កាត់ Gangnam ទីក្រុងសេអ៊ូល។

ចាប់ពីពេលនោះមក លោកស្រី បានចូលសម្រាកព្យាបាលនៅមន្ទីរពេទ្យ និងមានស្ថានភាពធូស្រាលឡើងវិញ បន្ទាប់ពីបុគ្គលិកពេទ្យព្យាបាលរបួសស្បែកក្បាលប្រវែង ១សង់ទីម៉ែត្រដែលមិនគំរាមកំហែងដល់អាយុជីវិតនោះទេ ។

យោងតាមទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូងបានឲ្យដឹងថា នគរបាល បានកំណត់អត្តសញ្ញាណអ្នកវាយប្រហារ ជាអនីតិជន អាយុ ១៥ឆ្នាំ ។

ការវាយប្រហារនេះ បានកើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីមេដឹកនាំគណបក្សប្រឆាំងលោក Lee Jae-myung ត្រូវបានគេចាក់ចំ ក ខណៈកំពុងនិយាយទៅកាន់អ្នកសារព័ត៌មាននៅទីក្រុងកំពង់ផែ Busan។ លោក Yoon បាននិយាយអំពីការវាយប្រហារលើលោកស្រី Bae ថាជា «អំពើភេរវកម្មប្រឆាំងអ្នកនយោបាយ ជាអ្នកតំណាងរបស់ប្រជាជន គឺមិនខុសគ្នាទៅនឹងអំពើភេរវកម្មប្រឆាំងប្រជាជននោះទេ។ ប្រទេសកូរ៉េខាងត្បូង កំពុងត្រៀមរៀបចំការបោះឆ្នោតដ៏សំខាន់មួយនៅថ្ងៃទី ១០ ខែមេសា ដែលនៅក្នុងនោះ គណបក្សអភិរក្សនិយមរបស់លោកប្រធានាធិបតី Yoon មានបំណងចង់ទទួលបានសំឡេងភាគច្រើនក្នុងសភាជាលើកដំបូង ចាប់តាំងពីឆ្នាំ ២០១៦មក ។