អនុរដ្ឋមន្ត្រីការបរទេសចិន បានជួបសមភាគីកូរ៉េខាងជើងនៅទីក្រុងព្យុងយ៉ាងនៅថ្ងៃសុក្រនេះ ដោយរដ្ឋប្រដាប់អាវុធនុយក្លេអ៊ែរ បានពន្លឿនការសាកល្បងអាវុធរបស់ខ្លួន និងការគំរាមកំហែងដល់ទីក្រុងសេអ៊ូលក្នុងរយៈពេលប៉ុន្មានខែថ្មីៗនេះ។

ទីក្រុងប៉េកាំង គឺជាអ្នកផ្តល់ផលប្រយោជន៍ផ្នែកសេដ្ឋកិច្ចដ៏ធំបំផុតរបស់កូរ៉េខាងជើង និងជាសម្ព័ន្ធមិត្តប្រពៃណី ហើយមេដឹកនាំគីម ជុងអ៊ុន បានព្យាយាមពង្រឹងទំនាក់ទំនងរបស់ប្រទេសរបស់ខ្លួនជាមួយប្រទេសចិន ខណៈពេលដែលបង្កើនវោហាស័ព្ទឈ្លានពានរបស់ខ្លួនចំពោះភាគខាងត្បូង។

ការតេស្តសាកល្បងអាវុធ និងការដែលលោកគីម ជុងអ៊ុន ចាត់ទុកទីក្រុងសេអ៊ូលជា «សត្រូវសំខាន់»របស់កូរ៉េខាងជើង នៅដើមខែនេះ បានបង្កើនភាពតានតឹង នៅក្នុងតំបន់ និងបាននាំឲ្យលោកប្រធានាធិបតីកូរ៉េខាងត្បូង យូន ស៊ុកយ៉ូល (Yoon Suk Yeol) ខិតទៅកាន់តែជិតសម្ព័ន្ធមិត្តដ៏យូរអង្វែងរបស់ទីក្រុងវ៉ាស៊ីនតោន។

សហរដ្ឋអាមេរិក ក៏បានព្រមានអំពីទំនាក់ទំនងយោធា «ដែលកំពុងរីកលូតលាស់ និងប្រកបដោយគ្រោះថ្នាក់» រវាងទីក្រុងព្យុងយ៉ាង និងទីក្រុងមូស្គូ ហើយបានអំពាវនាវឲ្យទីក្រុងប៉េកាំងបញ្ឈប់កូរ៉េខាងជើង។

នៅថ្ងៃសុក្រនេះ ទីភ្នាក់ងារសារព័ត៌មានមជ្ឈិមកូរ៉េផ្លូវការរបស់កូរ៉េខាងជើង បាននិយាយថា៖«គណៈប្រតិភូក្រសួងការបរទេសនៃសាធារណរដ្ឋប្រជាមានិតចិនដឹកនាំដោយសមមិត្ត ស៊ុន វ៉េដុង (Sun Weidong) អនុរដ្ឋមន្ត្រីក្រសួងការបរទេស បានមកដល់ទីក្រុងព្យុងយ៉ាង កាលពីថ្ងៃទី២៥។

រូបថតជាច្រើនរបស់សារព័ត៌មាន AFP បានបង្ហាញពីលោកស៊ុន និងគណៈប្រតិភូរបស់លោក បានជួបជាមួយអនុរដ្ឋមន្ត្រីការបរទេសកូរ៉េខាងជើង លោក ប៉ាក ម្យុងហូ (Pak Myong Ho) និងអ្នកផ្សេងទៀតនៅវិមានវប្បធម៌ប្រជាជន ក្នុងរដ្ឋធានីនេះ។