ប្រធានCIA លោក ប៊ីល ប៊ឺន (Bill Burns) ត្រូវបានគេរំពឹងថា នឹងជួបនៅប៉ុន្មានថ្ងៃខាងមុខជាមួយប្រធានចារកម្មរបស់អ៊ីស្រាអែល និងអេហ្ស៊ីប និងនាយករដ្ឋមន្ត្រីកាតា ដើម្បីពិភាក្សាអំពីកិច្ចព្រមព្រៀងមួយ ក្នុងគោលបំណងធានាឲ្យមានការដោះលែងចំណាប់ថ្នូរ ដែលនៅសេសសល់ដែលក្រុមហាម៉ាសបានចាប់ នេះបើយោងតាមមន្ត្រីអាមេរិកដែលដឹងអំពីផែនការនេះ។

កិច្ចប្រជុំជាមួយប្រធានទីភ្នាក់ងារចារកម្ម Mossad លោក ដេវីត បានៀ (David Barnea) ប្រធានចារកម្មអេហ្ស៊ីប លោកអាបាស កាម៉ែល (Abbas Kamel) និងនាយករដ្ឋមន្ត្រីកាតា លោក ម៉ូហាមេដ ប៊ីន អាប់ឌុលរ៉ាម៉ាន អាល់ថានី (Mohammed bin Abdulrahman Al Thani) នឹងកើតឡើង ចំពេលមានការពិភាក្សាយ៉ាងយកចិត្តទុកដាក់លើលក្ខខណ្ឌនៃកិច្ចព្រមព្រៀងថ្មី ដែលនឹងធានាដល់ការដោះលែងចំណាប់ថ្នូរជាមួយនឹងការបញ្ចប់ការប្រយុទ្ធគ្នា នៅតំបន់ហ្កាហ្សា។

មន្ត្រីរូបនេះបាននិយាយថា កិច្ចប្រជុំនេះ ត្រូវបានគេរំពឹងថា នឹងកើតឡើងនៅអឺរ៉ុប។ CIA បានបដិសេធមិនធ្វើអត្ថាធិប្បាយទេ។

មន្ត្រីជាន់ខ្ពស់អាមេរិកម្នាក់ទៀត អ្នកសម្របសម្រួលសេតវិមាននៅមជ្ឈិមបូព៌ា លោក ប្រិត ហ្គុក (Brett McGurk) បាននៅមជ្ឈិមបូព៌ាក្នុងសប្តាហ៍នេះ ដើម្បីបន្តការពិភាក្សាអំពីការដោះលែងចំណាប់ថ្នូរ។ លោកហ្គុក បានធ្វើទស្សនកិច្ចនៅទីក្រុងគែរ និង ដូហា សម្រាប់ការចរចានេះ។

ប្រទេសអេហ្ស៊ីប និងកាតា បានដើរតួជាតួអង្គសំខាន់ក្នុងការសម្របសម្រួលជាមួយក្រុមហាម៉ាស រួមទាំងការធានាការផ្អាកបណ្តោះអាសន្ន និងការដោះលែងចំណាប់ថ្នូរ នៅក្នុងខែវិច្ឆិកា។