ប្រធានសិទ្ធិមនុស្សរបស់អង្គការសហប្រជាជាតិ (UN) នៅថ្ងៃសុក្រ (ទី២៦ ខែមករា) នេះ បានថ្កោលទោសការប្រហារជីវិតអ្នកទោសនៅរដ្ឋ Alabama របស់សហរដ្ឋអាមេរិក ដោយឧស្ម័ននីត្រូហ្សែន ដោយនិយាយថា វិធីសាស្ត្រនេះអាចស្មើនឹងការធ្វើទារុណកម្ម។

អ្នកទោស Kenneth Smith ដែលត្រូវបានកាត់ទោសពីបទស៊ីឈ្នួលធ្វើឃាតកម្ម ឆ្នាំ១៩៨៨ ត្រូវបានប្រហារជីវិត កាលពីថ្ងៃព្រហស្បតិ៍ (ទី២៥ ខែមករា) ដោយឧស្ម័ននីត្រូហ្សែន ដែលជាការប្រើប្រាស់ដំបូងនៃវិធីសាស្រ្តថ្មី សម្រាប់ការកាត់ទោសប្រហារជីវិត គិតចាប់តាំងពីការសម្លាប់ដោយចាក់ថ្នាំ បានចាប់ផ្តើមនៅក្នុងសហរដ្ឋអាមេរិក កាលពី ៤ទសវត្សរ៍មុន។

លោក Volker Turk ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បាននិយាយថា៖ «ខ្ញុំមានការសោកស្តាយយ៉ាងខ្លាំង ចំពោះការប្រហារជីវិតលើលោក Kenneth Eugene Smith នៅរដ្ឋ Alabama បើទោះបីជាមានការបារម្ភយ៉ាងខ្លាំងក្លាថា វិធីសាស្ត្រថ្មី និងមិនបានធ្វើតេស្ត ក្នុងការធ្វើឲ្យថប់ដង្ហើមដោយឧស្ម័ននីត្រូហ្សែននេះ អាចស្មើនឹងការធ្វើទារុណកម្ម ឬការប្រព្រឹត្តិដ៏ឃោរឃៅ អមនុស្សធម៌ ឬគួរឲ្យអាម៉ាស់ក៏ដោយ»។

លោក Turk បានបន្ថែមថា៖ «ទោសប្រហារជីវិតគឺមិនស្របនឹងសិទ្ធិរស់រានជាមូលដ្ឋាននោះទេ។ ខ្ញុំជំរុញឲ្យរដ្ឋទាំងអស់ដាក់ចេញនូវការផ្អាកបណ្ដោះអាសន្នលើការប្រើប្រាស់វិធីនេះរបស់ខ្លួន ដែលជាជំហានឆ្ពោះទៅរកការលុបបំបាត់ទាំងស្រុង»។

លោក Smith បានរួចផុតពីការប៉ុនប៉ងប្រហារជីវិតម្ដង។ នៅខែវិច្ឆិកា ឆ្នាំ២០២២ មន្ត្រីរដ្ឋ Alabama បានបោះបង់ការកាត់ទោសប្រហារជីវិតដោយការចាក់ថ្នាំ បន្ទាប់ពីចំណាយពេលអស់ជាច្រើនម៉ោងយ៉ាងលំបាក ដើម្បីចាក់ម្ជុលចូលតាមសរសៃឈាមរបស់អ្នកទោសរូបនេះ៕