ប្រព័ន្ធផ្សព្វផ្សាយរបស់រដ្ឋ បានរាយការណ៍ថា អគ្គិភ័យដ៏ធំ បានឆាបឆេះឡើងនៅឯមន្ទីរពេទ្យមួយកន្លែង ក្នុងរដ្ឋធានីតេអេរ៉ង់របស់ប្រទេសអ៊ីរ៉ង់ កាលពីយប់ថ្ងៃព្រហស្បតិ៍ ដោយមន្រ្ដីម្នាក់និយាយថា ភ្លើងបានឆេះ ព័ទ្ធជុំវិញផ្នែកមុខអគារ។

វីដេអូដែលអ្នកសារព័ត៌មានReutersទទួលបាន បានបង្ហាញផ្នែកខាងក្រៅមន្ទីរពេទ្យហ្កានធី (Gandhi) ត្រូវភ្លើងឆេះដោយមានផ្សែងខ្មៅដែលហុយចេញពីអគារ។

អ្នកសារព័ត៌មានReuters អាចកំណត់ទីតាំងវីដេអូ ពីភិនភាគស្ថាបត្យកម្មនៃអគារដែលព័ទ្ធជុំវិញប្លង់ផ្លូវ និងកន្លែងចតរថយន្ដ ដែលត្រូវគ្នានឹងឯកសារ និងរូបភាពពីផ្កាយរណប និងវីដេអូពាក់ព័ន្ធ។

អ្នកនាំពាក្យក្រសួងអគ្គិភ័យក្រុងតេអេរ៉ង់លោក ចាឡាល់ ម៉ាលេគី បានប្រាប់ទូរទស្សន៍រដ្ឋថា ពុំមានអ្នកលស្លាប់ទេ ដោយបន្ថែមថា បុព្វហេតុនៃអគ្គិភ័យនេះ កំពុងស្ថិតក្នុងការស៊ើបអង្កេតនៅឡើយ។

ទូរទស្សន៍រដ្ឋ បាននិយាយនៅពេលមុននេះថា តំបន់ជុំវិញមន្ទីរពេទ្យហ្កានធី ភាគខាងជើងក្រុងតេអេរ៉ង់ត្រូវបានបិទ ហើយមន្ទីរពេទ្យក៏បានជម្លៀសមនុស្សចេញផងដែរ៕