កងទ័ពជើងទឹកឥណ្ឌា ត្រូវបានដាក់ពង្រាយកាលពីថ្ងៃសៅរ៍ ដើម្បីជួយនាវាម៉ាលីន លូនដា (Marlin Luanda) ដែលជានាវាពាណិជ្ជកម្ម បន្ទាប់ពីនាវានេះ បាន​ទទួល​រង​ការ​វាយ​ប្រហារ​ដោយ​​មីស៊ីលប្រឆាំងនាវារបស់ក្រុមហ៊ូធីនៅ ក្នុងឈូងសមុទ្រអេដែន(Aden)។

ពាណិជ្ជកររបស់ក្រុមហ៊ុនដឹកទំនិញត្រាហ្វីហ្គូរ៉ា (Trafigura) និងយោធាអាមេរិក បាន​និយាយ​កាល​ពី​ថ្ងៃសុក្រថា នាវាដឹកប្រេងមួយគ្រឿងត្រូវភ្លើងឆេះ ប៉ុន្ដែមិនមានអ្នកស្លាប់ និងអ្នករងរបួស ត្រូវ​បាន​គេរាយការណ៍អោយដឹងទេ បន្ទាប់ពីនាវានោះបានទទួលរងការវាយប្រហារមក។

អ្នក​នាំ​ពាក្យកងទ័ពជើងទឹកឥណ្ឌា បាននិយាយនៅលើបណ្តាញសង្គមX ដែលមុន​ឈ្មោះថា​Twitter ថា កងទ័ពជើងទឹកឥណ្ឌា បានដាក់ពង្រាយក្រុមការពារនុយក្លេអ៊ែរ អាវុធជីវសាស្រ្ដ ហើយ​និងអាវុធគីមីរួមជាមួយឧបករណ៍ប្រយុទ្ធ ដើម្បីឆ្លើយតប​ទៅ​នឹង​ការ​ហៅ​ទូរស័ព្ទ​បន្ទាន់​របស់​នាវា​ដឹក​ប្រេងដែលមាននាវឹកឥណ្ឌា២២នាក់ និងនាវឹកបង់ក្លាដែសម្នក់ នៅលើនាវានោះ។

តាម​រូបភាពដែលផ្សព្វផ្សាយដោយកងទ័ពជើងទឹកឥណ្ឌា បាន​បង្ហាញ​ផ្នែក​ជា​ច្រើន​នៃ​នាវា​ដែល​មាន​ដោត​ទង់ជាតិកោះម៉ាសសាល (Marshall Islands) ត្រូវភ្លើងឆេះ និងដុំផ្សែង​កំពុង​ហុយ​ឡើង​ទៅលើអាកាស​។

កាលពីដើមខែនេះ កងទ័ពជើងទឹក បាននិយាយថា ខ្លួនបានជួយសង្រ្គោះនាវិកនៃនាវា១គ្រឿង ដែល​មានម្ចាស់ជាជនជាតិអាមេរិក នៅក្នុងឈូង​សមុទ្រ​អាដែន​(Aden)ប​ន្ទាប់​ពី​បាន​ទទួល​រង​ការ​វាយ​ប្រហារ​របស់ក្រុមចលនាហ៊ូធី ស្របពេលដែលមាន​ភាពតាន​តឹង​នៅផ្លូវ​សមុទ្រ​ក្នុង​តំបន់​ដែល​បាន​បន្ទុច​បង្អាក់ដល់ពាណិជ្ជកម្មពិភពលោកទៀតផង៕ អត្ថបទ៖ មករា