រដ្ឋមន្រ្ដីការបរទេសអាល្លឺម៉ង់លោកស្រី អានណាលេណា ប៊ែរបក់ (Annalena Baerbock) បាន​ពិភាក្សា​ពីសង្រ្គាមនៅក្នុងតំបន់ហ្កាហ្សាជាមួយសមភាគីហ្ស៊កដានីរបស់លោកស្រី គឺលោក អាយ​ម៉ាន់​ សាហ្វាឌី (Ayman Safadi) នៅក្នុង​អំឡុង​ពេល​ទស្សនកិច្ច​របស់​លោកស្រី​ទៅ​ក្រុង​អាម៉ង់​កាល​ពី​ថ្ងៃសៅរ៍ម្សិលមិញ។

ក្រសួងការបរទេសហ្ស៊កដានីបាននិយាយនៅលើបណ្តាញសង្គម X ថា កិច្ចពិភាក្សា បាន​លើក​ឡើង​ពី​ផល​ប៉ះពាល់ដ៏មហន្ដរាយ នៃការបន្ដសង្រ្គាម ហើយនិង​កិច្ច​ប្រឹងប្រែង ដើម្បី​បញ្ឈប់​សង្រ្គាម​។

ក្រសួងខាងលើ បានបន្ថែមថា កិច្ចពិភាក្សាបានលើកឡើងផងដែរ ពីតម្រូវការ​សម្រាប់​សហគមន៍​អន្ដរជាតិ ដើម្បីធ្វើសេចក្ដីសន្និដ្ឋានពីការទទួលខុសត្រូវផ្នែកច្បាប់ និងផ្នែកមនុស្សធម៌របស់ខ្លួន ហើយ​ត្រូវ​តែ​ចាប់​ផ្ដើម​អោយ​មាន​សកម្មភាព​របស់​អន្ដរជាតិ​ជា​បន្ទាន់ និង​មាន​ប្រសិទ្ធិភាព​ដើម្បី​បញ្ឈប់​សង្រ្គាម និងធានាអោយមានការការពារជនស៊ីវិល ការផ្ដល់ជំនួយ​គ្រប់គ្រាន់ និង​មាន​ស្ថិរភាព​ទៅ​ផ្នែកជាច្រើនក្នុងតំបន់ហ្កហ្សា៕ អត្ថបទ៖ មករា