​បាល់ទាត់៖ រាត្រី​ថ្ងៃ​ចន្ទ​ជា​រាត្រី​ដែល​គួរ​ឱ្យ​ភ្ញាក់ផ្អើល​មួយ​ នៅ​ក្នុង​ព្រឹត្តិការណ៍​បាល់ទាត់​ទ្វីប​អឺរ៉ុប Euro ២០២០ ឆ្នាំនេះ​ក៏ដូចជា​នៅ​ក្នុង​ពិភព​បាល់ទាត់​ទាំងមូល​។

​​ការប្រកួត​វគ្គ ១៦ក្រុម​ចុងក្រោយ​ ២​ប្រកួត​មាន​គ្រាប់​បាល់​សរុប ១៤គ្រាប់​ហើយ​ក្រុម​ជើងឯក​ពិភព​លោក និង​ជើងឯករង Euro ២០១៦ បារាំង​ធ្លាក់​ពី​ការប្រកួត​ក្រោយ​ចាញ់​ស្វ៊ី​ស​នៅ​វគ្គ ១១ម៉ែត្រ​កាត់​សេចក្ដី​។ ​​និយាយ​ពី​បារាំង​បាន​នាំមុខ​ការប្រកួត​ក្នុង​ម៉ោង ៩០នាទី ៣-១ គិត​ត្រឹម​នាទី​ទី៧៥ ដោយ​គ្រាប់​របស់ Karim Benzema ពីរ​គ្រាប់ និង Paul Pogba មួយ​គ្រាប់ ​តែ​ស្វ៊ី​ស​ពីក្រោយ​ ២​គ្រាប់​នៅ​នាទី​ទី៨១ និង ៩០ ដោយ Stefan Seferovic គ្រាប់​ទី​២ និង Gavranovic​។ ​​វគ្គ ១១ម៉ែត្រ​កាត់សេចក្តី​បារាំង​បែរ​ជា​ចាញ់​ស្វ៊ី​ស​ ក្រោយ​គ្រប់គ្នា​សុទ្ធតែ​ស៊ុត​ចូល​តែ Kylian Mbappe ស៊ុត​មិន​ចូល​។ ​​ជា​ប្រវត្តិសាស្ត្រ​សំរាប់​ស្វ៊ី​ស​ដែល​ខកខាន​ឡើង​វគ្គ ៨ក្រុម​ចុងក្រោយ​ព្រឹត្តិការណ៍​ធំ​តាំងពី World Cup ១៩៥៤ ដែល​ខ្លួន​ជា​ម្ចាស់ផ្ទះ​។

​​ជំនួប​រវាង​បារាំង ​និង​ស្វ៊ី​ស​ស៊ុត​បញ្ចូល​ទី​គ្នា ៦គ្រាប់ ឯ​ជំនួប​រវាង​ក្រូ​អាស៊ី​ និង​អេ​ស្ប៉ា​ញ​ទំរាំ​រក​ចាញ់​ឈ្នះ​ឃើញក្រុម​ទាំងពីរ​ស៊ុត​បញ្ចូល​ទី​គ្នា ៨គ្រាប់​។ ​​គ្រាប់​បាល់​តាម​ស្មើ​របស់​ក្រូ​អាស៊ី​មិន​ខុស​ពី​ស្វ៊ី​ស​ទេ តែ​ពួកគេ​មានជោគ​វាសនា​ខុសពី​ស្វ៊ី​ស​។ ​​អេ​ស្ប៉ា​ញ​បាន​នាំមុខ ៣-១ ត្រឹម​នាទី​ទី៧៦ ដោយ Sarabia, Azpilicueta និង Ferran Torres តែ​ក្រូ​អាស៊ី​តាម​បាន​ ២​គ្រាប់​វិញ​នៅ​នាទី​ទី៨៥ និង ៩០+២ ដោយ Mislav Orsic និង Mario Pasalic​។ ​​តែ​នៅក្នុង​ម៉ោង​បន្ថែម ១៥នាទី​ពីរលើក​នោះ​អេ​ស្ប៉ា​ញ​រកបាន​ ២​គ្រាប់​ដើម្បី​ធានា​កៅអី​នៅ​វគ្គ ៨ក្រុម​ចុងក្រោយ​ជួប​ជាមួយ​ស្វ៊ី​ស​៕

​អត្ថបទ​៖​នាង សុភា​វុ​ធ