អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា ប្រទេសកូរ៉េខាងជើង បាន​បាញ់​មីស៊ីល​តម្រង់គោលដៅជាច្រើនគ្រាប់ចេញពីឆ្នេរសមុទ្រភាគខាងកើតរបស់ខ្លួននៅថ្ងៃអាទិត្យ (២៨ មករា) នេះដែលជាការបាញ់បង្ហោះលើកទីពីររបស់ខ្លួនក្នុងរយៈពេលតិចជាងមួយសប្តាហ៍។

អគ្គសេនាធិការ JCS បាននិយាយថា មីស៊ីលទាំងនោះត្រូវបានបាញ់នៅម៉ោងប្រហែល ៨ព្រឹក (ម៉ោងក្នុងស្រុក) ហើយកំពុងត្រូវបានវិភាគដោយអាជ្ញាធរចារកម្មកូរ៉េខាងត្បូង និងសហរដ្ឋ​អាមេរិក ដោយមិនបានបញ្ជាក់ពីចំនួនមីស៊ីលដែលត្រូវបានបាញ់នោះទេ។

អគ្គសេនាធិការ​នោះបាននិយាយនៅក្នុងសេចក្តីថ្លែងការណ៍មួយថា «ខណៈពេលដែល​ពង្រឹង​ការ​ឃ្លាំ​មើល និងការប្រុងប្រយ័ត្ន យោធារបស់កូរ៉េខាងត្បូង កំពុងសហការ​យ៉ាងជិតស្និទ្ធ​ជាមួយ​សហរដ្ឋ​អាមេរិក ហើយកំពុងតាមដានសញ្ញា និងសកម្មភាពបន្ថែមពីកូរ៉េខាងជើង»។

ការ​បាញ់បង្ហោះចុងក្រោយនេះបានកើតឡើងប៉ុន្មានថ្ងៃបន្ទាប់ពីកូរ៉េខាងជើង បានបាញ់​នូវ​អ្វី​ដែល​ខ្លួន​ហៅថា បាញ់មីស៊ីលតម្រង់គោលដៅយុទ្ធសាស្ត្រថ្មីមួយឈ្មោះថា មីស៊ីល «ភូលវ៉ាសាល ៣-៣១» (Pulhwasal-3-31) ដែលបង្ហាញថា​មីស៊ីល​នោះ​មាន​សមត្ថភាព​បំពាក់​ក្បាល​គ្រាប់​នុយក្លេអ៊ែរ​។

កូរ៉េខាងជើង កំពុងបង្កើនការប្រឈមមុខដាក់គ្នាជាមួយសហរដ្ឋអាមេរិក និងសម្ព័ន្ធមិត្តរបស់ខ្លួន ប៉ុន្តែ​ក្រុមមន្ត្រីនៅទីក្រុងវ៉ាស៊ីនតោន និងទីក្រុងសេអ៊ូល បាននិយាយថា ពួកគេមិន​បាន​រក​ឃើញ​សញ្ញា​ណាមួយដែលទីក្រុងព្យុងយ៉ាង មានបំណងចាត់វិធានការយោធាក្នុងពេលឆាប់ៗនោះទេ៕