ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយកាលពីថ្ងៃសៅរ៍ (២៧ មករា) ថា ចំនួនអ្នកស្លាប់ដែលជាជនជាតិប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុង​បន្ត​លើ​តំបន់​ហ្កាហ្សាស្ទ្រីប បានកើនឡើងដល់ ២៦.២៥៧នាក់ ចាប់តាំងពីថ្ងៃទី០៧ ខែតុលា ឆ្នាំ​២០២៣មក។

ក្រសួងនេះបាននិយាយនៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល​បាន​សម្លាប់​ជន​ជាតិ​ប៉ាឡេស្ទីន ១៧៤នាក់ និងបង្ករបួស ៣១០នាក់ ផ្សេងទៀតក្នុងរយៈពេល ២៤ម៉ោង​កន្លង​មក​នេះ​។

ក្រសួងដដែលនោះបានបន្ថែមថាជម្លោះដែលកំពុងបន្តបានធ្វើឱ្យប្រជាជនប៉ាឡេស្ទីនយ៉ាងហោចណាស់ ៦៤.៧៩៧នាក់ រងរបួស ដោយកត់​សម្គាល់​ថា​ ជនរងគ្រោះ​មួយ​ចំនួន​ធំ​នៅ​តែស្ថិត​នៅ​ក្រោម​គំនរ​បាក់បែក ដោយសាររថយន្តសង្គ្រោះបន្ទាន់ និងក្រុមការពារ​ស៊ីវិលមិន​អាច​ទៅដល់​ពួក​គេ​។

អ៊ីស្រាអែលបានបន្តប្រតិបត្តិការយោធាយ៉ាងខ្លាំងក្លារបស់ខ្លួននៅហ្កាហ្សា កាលពីនៅថ្ងៃសៅរ៍ ហើយ​ការប៉ះទង្គិចគ្នាយ៉ាងខ្លាំងបានផ្ទុះឡើងរវាងក្រុមប៉ាឡេស្ទីន និងកម្លាំងអ៊ីស្រាអែល នៅ​តាម​តំបន់ផ្សេងៗក្នុងក្រុងខាន់ យ៉ូនីស (Khan Younis) នៅភាគខាងត្បូងតំបន់ហ្កាហ្សា ជាដើម។

កង​ទ័ពអ៊ីស្រាអែល បានបាញ់ផ្លោងជុំវិញបរិវេណនៃបរិវេណដែលជាកម្មសិទ្ធិរបស់ទីភ្នាក់ងារជំនួយ និងការងារ​របស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅទីក្រុង ខាន់ យ៉ូនីស ដែលបណ្តាល​ឱ្យមានអ្នករងរបួសមួយចំនួនធំ៕