នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាន​បង្កើនសម្ពាធជាសាធារណៈលើប្រទេសកាតា ដើម្បីនាំយកការដោះលែងចំណាប់ថ្នូរហ្កាហ្សា កាល​ពី​ថ្ងៃសៅរ៍ (២៧ មករា) ដោយនិយាយថា ​ប្រទេសឈូង​សមុទ្រអារ៉ាប់មួយ​នេះ​គួរ​តែ​អនុវត្ត​ឥទ្ធិពល​ដែលខ្លួនមានក្នុងនាមជាម្ចាស់ផ្ទះ និងជាអ្នកផ្តល់មូលនិធិដល់ក្រុមសកម្មប្រយុទ្ធហាម៉ាស ដែល​កំពុងកាន់កាប់ចំណាប់ថ្នូរ។

ការលើកឡើង​ខុសប្រក្រតីនេះបានកើតឡើងនៅមុនថ្ងៃនៃអ្វីដែលប្រភពសារព័ត៌មានរ៉យទ័រ បាន​ពិពណ៌នាថា ​ជាកិច្ចប្រជុំក្នុងចំណោមនាយករដ្ឋមន្ត្រីកាតា និងប្រធានចារកម្មមកពីអ៊ីស្រាអែល សហរដ្ឋអាមេរិក និងអេហ្ស៊ីប ដើម្បី​ពិភាក្សា​អំពី​លទ្ធភាព​កិច្ច​ព្រម​ព្រៀង​ថ្មី​មួយ​ក្នុង​ការ​ដោះលែង​ចំណាប់ថ្នូរ។

ប្រភពនោះបាននិយាយថា កិច្ចពិភាក្សា​ទាំង​នោះត្រូវ​បាន​គេរំពឹងថានឹង​ធ្វើ​ឡើង​នៅ​ក្នុង​ទីតាំង​ដែល​មិន​បានបង្ហាញនៅក្នុងទ្វីបអឺរ៉ុប នៅថ្ងៃអាទិត្យ (២៨ មករា)។ ទោះជាយ៉ាងនេះក្តី ក្រុម​មន្ត្រី​មកពីប្រទេសទាំងបួន មិនបានបញ្ជាក់ពីកិច្ចប្រជុំជាផ្លូវការនោះទេ។

ប្រទេសកាតា និងអេហ្ស៊ីប មានបណ្តាញបើកចំហទៅកាន់អ៊ីស្រាអែល និងក្រុមហាម៉ាស ហើយ​បាន​សម្របសម្រួលបទឈប់បាញ់មួយកាលពីខែវិច្ឆិកា ដែលក្រុមហាម៉ាស បានដោះលែង​ចំណាប់​ថ្នូរ​មួយចំនួនក្នុងចំណោមមនុស្ស ២៥៣នាក់ ដែលខ្លួនបាន​ចាប់​ខ្លួន​នៅ​ក្នុង​ការ​វាយ​ប្រហារ​ឆ្លង​ព្រំដែនកាលពីថ្ងៃទី០៧ ខែតុលា ដែលបង្កឱ្យមានសង្រ្គាមនៅហ្កាហ្សា៕