អ៊ីស្រាអែល បានបន្តវាយសម្រុកទៅមុខកាលពីថ្ងៃសៅរ៍ (២៧ មករា) ជាមួយ​នឹងយុទ្ធនាការ​របស់​ខ្លួន​ប្រឆាំងនឹងក្រុមហាម៉ាស នៅក្នុងទីក្រុង ខាន់ យ៉ូនីស (Khan Younis) នៃតំបន់ហ្កាហ្សា ខណៈ​ដែលអាកាសធាតុអាក្រក់បានវាយប្រហារជនភៀសខ្លួនប៉ាឡេស្ទីន ដែល​កំពុងស្វែងរក​ការជ្រក​កោន​នៅភាគខាងជើង និងបង្កការលំបាក​បន្ថែមទៀត​នៅ​ក្នុង​តំបន់​ហ៊ុមព័ទ្ធ​ដែល​រង​ការខូចខាតធ្ងន់ធ្ងរមួយនេះ។

អ្នកស្រុកបានរាយការណ៍ថាមានការបាញ់ពីលើអាកាស និងពីរថក្រោះយ៉ាងខ្លាំងក្លានៅទូទាំងក្រុង ខាន់ យ៉ូនីស ដែលជាផ្នែកមួយនៃភាគខាងត្បូងតំបន់ហ្កាហ្សា ដែលបានក្លាយ​ជាការផ្តោតសំខាន់​នៃ​ការវាយលុកថ្មើរជើងរបស់អ៊ីស្រាអែល ប្រឆាំងនឹងក្រុមហាម៉ាស និងនៅ​ជុំវិញ​មន្ទីរពេទ្យ​សំខាន់​ចំនួន​ពីរកន្លែងនៅទីនោះ។

ក្រុមហាម៉ាសបាននិយាយថា យុទ្ធជនរបស់ខ្លួនបានបាញ់មីស៊ីលប្រឆាំងរថក្រោះ ទៅកាន់​រថក្រោះ​អ៊ីស្រាអែល នៅភាគនិរតីក្រុង ខាន់ យ៉ូនីស ខណៈយោធាអ៊ីស្រាអែលបាននិយាយថា ខ្លួន​បាន​សម្លាប់​ខ្មាន់កាំភ្លើងយ៉ាងតិច ១១នាក់ ដែលកំពុងព្យាយាមដាក់គ្រឿងផ្ទុះនៅជិតកងទ័ព និង​ខ្លះ​ទៀត​បានបាញ់កាំភ្លើង និងគ្រាប់បែកដៃ ទៅលើទាហានរបស់ខ្លួន។

អ្នកនាំ​ពាក្យក្រសួងសុខាភិបាលហ្កាហ្សា លោក អាស្រាហ្វ អាល់គីដ្រា (Ashraf Al-Qidra) បាន​និយាយថា ការទម្លាក់គ្រាប់បែករបស់អ៊ីស្រាអែល កំពុងធ្វើឱ្យខូចដល់ប្រព័ន្ធថែទាំសុខភាព និង​បង្កគ្រោះថ្នាក់ដល់អាយុជីវិតរបស់វេជ្ជបណ្ឌិត អ្នកជំងឺ និងជនភៀសខ្លួនហ្កាហ្សារាប់ម៉ឺននាក់៕