ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកលើកដែកខេត្តកណ្តាលបានថ្លែងថា ការបោសសម្អាតសំណល់យុទ្ធភណ្ឌសង្គ្រាម និងនាវាលិចនៅបាតទន្លេ គឺជាការពង្រឹងសន្តិសុខជាតិ សុខសុវត្ថិភាពការដឹកជញ្ជូនផ្លូវទឹក និងសុខសុវត្ថិភាពប្រជាពលរដ្ឋនៅតាមដងទន្លេ រួមទាំងអាចប្រើប្រាស់សម្រាប់ដាក់តាំងបង្ហាញពីសំណល់យុទ្ធសង្គ្រាមនៅកម្ពុជាផងដែរ។
ឯកឧត្តម ហេង រតនា ថ្លែងបែបនេះនៅក្នុងវេទិកាសាធា រណៈដែលរៀបចំដោយក្រុមការងារអន្តរក្រសួង រួមជាមួយអាជ្ញាធរស្រុកលើកដែក ខេត្តកណ្តាល និងអាជ្ញាធរស្រុកពាមជរ ខេត្តព្រៃវែង ស្តីពីការពង្រីកទីតាំងថ្មី សម្រាប់កិច្ច ប្រតិបត្តិការស្រង់គ្រាប់ និងបំណែកនាវាលិចនៅបាតទន្លេក្នុងភូមិសាស្ត្រ ភូមិខ្ពប ឃុំព្រែក សំបួរ, ស្រុកពាមជរ, ខេត្តព្រៃវែង និងនៅ ភូមិជ្រៃថ្មី, ឃុំកោះរកា, ស្រុកពាមជរ ខេត្តព្រៃវែង នាថ្ងៃទី ២៨ ខែមករា ឆ្នាំ២០២៤នេះ ដើម្បីស្តាប់ពីកង្វល់ និងសំណូមពរហើយធ្វើការដោះស្រាយជូនប្រជាពលរដ្ឋក្នុងមូលដ្ឋានខេត្តកណ្តាល និងខេត្តព្រៃវែងនេះផងនោះ។
បើយោងតាមរបាយការណ៍របស់ឧត្តមសេនីយ៍ត្រី ម៉ុង សុគន្ធារ័ត្ន ប្រធានការដ្ឋាន បង្ហាញនៅក្នុងពិធីវេទិកាសាធារណៈជាមួយប្រជាជនរស់នៅតំបន់ស្រង់គ្រាប់នៅឃុំពាមរាំង ថ្ងៃទី២៨ខែមករានេះបានបញ្ជាក់ថា បញ្ហាទូទៅនៃនាវា/ទូកលិចក្នុងទឹក និងគ្រាប់មិនទាន់ផ្ទុះនៅកម្ពុជា ផ្អែកតាមព័ត៌មានស្រាវជ្រាវពីឯកសារនានា ក្នុងនោះព័ត៌មានរបស់កងទ័ពអាកាសសហរដ្ឋអាមេរិកក៏បានឲ្យដឹងថា បានបើកការវាយប្រហារសំដៅលើទូក/នាវាដឹកគ្រាប់ផ្សេងៗនៅកម្ពុជាចំនួន ៣៤៨លើក និងការទម្លាក់គ្រាប់បែកធំៗ (ជាប្រភេទ KM84 ទម្ងន់ ៩២៥គ.ក,KM83ទម្ងន់ ៤៥០គ.ក, KM82ទម្ងន់ ២៣០គ.ក ពីយន្តហោះជាង១០.០០០ គ្រាប់នៅតាមដងទន្លេ (១៩៦៩-១៩៧៣)។ ប៉ុន្តែរបាយការណ៍នេះមិនបានបូកបញ្ចូលកំលាំងផ្សេងៗទៀតដូចជា កម្លាំងខ្មែរក្រហមបានបាញ់ពន្លេចទូក/នាវាដឹកគ្រាប់របស់កម្លាំងលន់នល់ និងទាហ៊ានលន់នល់នោះទេ។ ឯកសារមួយចំនួនក៏បង្ហាញពីបរិមាណគ្រាប់ដឹកជញ្ជូនតាមនាវាទាំងនាវាស៊ីវិល និងកងទ័ពពីប្រទេសវៀតណាមខាងត្បូងមកភ្នំពេញតាមដងទន្លេមេគង្គមានចំនួនប្រមាណ ៦០.០០០ តោនក្នុងមួយខែៗក្នុងអំឡុងសង្គ្រាមឆ្នាំ១៩៧០ ដល់ឆ្នាំ១៩៧៥។ ជាក់ស្តែងនៅភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែង ក្នុងទីតាំងប្រារព្ធពិធីនេះ អង្គភាពស៊ីម៉ាក់បានរកឃើញគ្រាប់យុទ្ធភណ្ឌមិនទាន់ផ្ទុះ និងមីនសរុបចំនួន ២១,៦៥៦គ្រាប់ និងបំណែកនាវាបំណែកដែកទំងន់ ២១,៨០៤គីឡូក្រាម។ សរុបទាំងមីន/គ្រាប់, បំណែកនាវា និងបន្ទះដែក មានទំងន់ ២១៤ តោន។
របាយការណ៍របស់ឧត្តមសេនីយ៍ត្រី ម៉ុង សុគន្ធារ័ត្ន បានបន្តឲ្យដឹងថា តាមការស្រាវជ្រាវព័ត៌មានរបស់អង្គភាពស៊ីម៉ាក់ស្ដីអំពីនាវា/ទូកលិចតាមដងទន្លេមេគង្គ ទន្លេសាប ទន្លេសេសាន និងទន្លេស្រែពក ក្នុងនោះមួយផ្នែកដោយផ្អែកលើតែឯកសារព័ត៌មាន និងការសិក្សាព័ត៌មាន គឺបានសន្មត់ចំនួននាវា/ទូកលិច (អាចមានទូកតូចៗផងដែរ) តាមដងទន្លេទាំងអស់មានចំនួន ១៩៧ទីតាំង។ ក្នុងឆ្នាំ ២០១១-២០១៥ កម្លាំងស្រាវជ្រាវក្រោមទឹករបស់អង្គភាពស៊ីម៉ាក់ បានធ្វើការស្រាវ ជ្រាវព័ត៌មានស្វែងរកទីតាំងជាក់ ស្តែងទៅតាមភូមិសាស្ត្រដែលអាចមានផ្លូវទៅដល់ឬអាចសាកសួរសាក្សីដែលជាប្រជាពលរដ្ឋ អ្នកមុជទឹកកាត់ដែកអេតចាយ អ្នកប្រមូលទិញអេតចាយ និងអ្នកប្រកបមុខរបរតាមដងទន្លេទាំងឡាយ ជាពិសេសអាជ្ញាធរ និងកងកម្លាំងក្នុងមូលដ្ឋានក្នុងការឈានទៅកំណត់បញ្ជាក់ទីកន្លែងបានច្បាស់លាស់។
ដោយឃើញបញ្ហា និងទំហំកិច្ចប្រតិបត្តិការបោសសម្អាតយុទ្ធភណ្ឌមិនទាន់ផ្ទុះ និង ស្រង់នាវាលិចបាតទន្លេ មានវិសាលធំធេងនោះ ហើយក៏ដូចជាការពន្លឿនល្បឿននៃការបោសសម្អាតឲ្យបានឆាប់រហ័ស និងទាន់ពេលវេលា ក្រុមការងារបោសសម្អាតយុទ្ធមិនទាន់ផ្ទះ និងស្រង់នាវាលិចក្នុងបាតទន្លេ របស់អន្តរក្រសួង មានផែនការពង្រីកកំលាំងប្រតិបត្តិការរបស់ខ្លួនចូលទីតាំងចំនួន០២បន្ថែមទៀតស្របតាមគោល ការណ៍របស់រាជរដ្ឋាភិបាល គឺទីតាំងទី ១ ស្ថិតនៅក្នុងភូមិ សាស្ត្រភូមិខ្ពប ឃុំព្រែកសំបូរ ស្រុកពាមជរ ខេត្តព្រៃវែង ដែលមានផ្ទៃដី ១.៦៩០.០០០ ម៉ែត្រការ៉េ និងទីតាំងទី០២ គឺស្ថិតនៅក្នុងភូមិសាស្ត្រ ភូមិជ្រៃថ្មី, ឃុំកោះរកា, ស្រុកពាមជរ, ខេត្តព្រៃវែង ដែលមានផ្ទៃដី ៩៧.៣៥០ម៉ែត្រការ៉េ។ ទីតាំងទាំង២ខាងលើនេះ ក្រុម ការងារបោសសម្អាតយុទ្ធ ភណ្ឌមិនទាន់ផ្ទុះ និងស្រង់បំណែកនាវារបស់ក្រុមការងារអន្ដរក្រសួង បានចាប់ផ្ដើមធ្វើការសិក្សាស្រាវជ្រាវចាប់តាំងពីពាក់កណ្តាលឆ្នាំ២០២៣ មកម្លេះ ។ចំពោះការបោសសម្អាតយុទ្ធភណ្ឌមិនទាន់ផ្ទះ និងស្រង់បំណែកនាវា សម្រាប់ ២ ទីតាំងថ្មីនេះ អង្គភាពស៊ីម៉ាក់មានផែនការពង្រាយកម្លាំងរបស់ខ្លួន ១០០នាក់ និងកម្លាំងនៃអគ្គស្នងការនគរបាលជាតិ ចំនួន១២នាក់ទៀតសរុបទាំងអស់មានចំនួន ១១២នាក់ ដោយប្រើប្រាស់សម្ភារបច្ចេកទេសសំខាន់ៗ សម្រាប់គាំទ្រដល់កិច្ចប្រតិបត្តិការបោសសំអាតគ្រាប់ និងមីននៅបាតទន្លេនេះ ៕ អត្ថបទ៖ ភារម្យ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
