អេ​ត្យូ​ពី​៖ រដ្ឋាភិបាល​អេ​ត្យូ​ពី​បាន​ប្រកាស​បទ​ឈប់​បាញ់​ ជា​ឯកតោភាគី​នៅ​តំបន់ Tigray ភាគ​ខាងជើង​របស់​ខ្លួន​ បន្ទាប់​ពី​មាន​ជម្លោះ​ដ៏​ក្ដៅ​គគុក​ជិត ៨​ខែ​ដែល​អង្គការសហប្រជាជាតិ​បាន​និយាយ​ថា​ បាន​រុញ​ដោល​ប្រជាជន​ចំនួន ៣៥០.០០០​នាក់​ធ្លាក់​ក្នុង​គ្រោះ​ទុរ្ភិក្ស​ ខណៈ​ក្រុម​ឧទ្ទាម​បាន​ចូល​ទៅ​ក្នុង​រដ្ឋធានី​ Mekelle​។

​រណសិរ្ស​រំដោះ​ប្រជា​ប្រជាជន​ Tigray (TPLF) ដែល​ជា​អតីត​គណបក្ស​គ្រប់គ្រង​ក្នុង​តំបន់ ​បាន​និយាយ​កាលពី​ថ្ងៃ​ចន្ទ​ថា ​ខ្លួន​បាន​គ្រប់គ្រង​រដ្ឋធានី​ Mekelle ឡើងវិញ​ ហើយ​អ្នកស្រុក​បាន​រាយ​ការណ៍​ថា​ បាន​ឃើញ​កងទ័ព​នៅ​ក្នុង​ឯកសណ្ឋាន​តំបន់ Tigray នៅ​ក្នុង​ទីក្រុង​ជា​លើកដំបូង​ចាប់​តាំង​ពី​ខែ​វិច្ឆិកា​។​ ​អ្នកនាំពាក្យ​របស់​រណសិរ្ស​រំដោះ​ប្រជា​ប្រជាជន​ Tigray លោក Getachew Reda បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា រដ្ឋធានី Mekelle របស់​តំបន់​ Tigray គឺ​ស្ថិត​នៅ​ក្រោម​ការគ្រប់គ្រង​របស់​យើង។​ ​អ្នកឆ្លើយឆ្លង​ព័ត៌មាន​របស់ Al Jazeera លោក Malcolm Webb និយាយ​ពី​ទីក្រុង Nairobi ប្រទេស​កេន​យ៉ា​បាន​និយាយ​ថា ​មាន​សេចក្ដីរាយការណ៍​ពី​ប្រជាជន​ដែល​កំពុង​អបអរ​នៅ​តាម​ដង​ផ្លូវ ... ហើយ​អ្នកស្រុក​បាន​បាញ់​កាំជ្រួច​ភ្ញី​។​

​សេចក្ដីថ្លែងការណ៍​ស្តី​ពី​បទ​ឈប់​បាញ់ "​ជា​ឯកតោភាគី​" កាលពី​ថ្ងៃ​ចន្ទ​ដែល​បាន​ផ្សាយ​ដោយ​ប្រព័ន្ធ​ផ្សព្វផ្សាយ​រដ្ឋ​បាន​កើតឡើង​ភ្លាមៗ​ បន្ទាប់ពី​រដ្ឋបាល​បណ្ដោះ​អាសន្ន​តំបន់ Tigray ដែល​ត្រូវ​បាន​តែង​តាំង​ដោយ​រដ្ឋាភិបាល​សហព័ន្ធ ​ក្រោយ​យកឈ្នះ​កងកម្លាំងរណសិរ្ស​រំដោះ​ប្រជា​ប្រជាជន ​Tigray បាន​ភៀសខ្លួន​ពី​រដ្ឋធានី ​Mekelle និង​បាន​អំពាវនាវ​ឱ្យ​មាន​បទ​ឈប់​បាញ់​មួយ​លើ​មូលដ្ឋាន​មនុស្សធម៌ ​ដូច្នេះ​ជំនួយ​ដែល​ត្រូវការ​ជា​ចាំបាច់អាច​ត្រូវ​បាន​ផ្តល់​ជូន​៕

អត្ថបទ៖ សុខមាន