ការកែវិញ្ញាសាសរសេរប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា បានចាប់ផ្តើមដំណើការពីថ្ងៃនេះតទៅ ហើយគ្រោងបញ្ចប់នៅក្នុងសប្តាហ៍ទី១ ខែកុម្ភៈឆ្នាំ២០២៤។ ការកែវិញ្ញាសាប្រឡងនេះធ្វើឡើងដោយតម្លាភាព។
ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាអនុប្រធានគណៈកម្មការរៀបចំការប្រឡងប្រជែងជ្រើសរើសគ្រូបង្រៀនឯកទេស អប់រំកាយ និងកីឡា នៅថ្ងៃទី២៩ ខែមករា ឆ្នាំ២០២៤នេះ បានឱ្យដឹងថា ការកែវិញ្ញាសាប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា ធ្វើឡើងដោយមានការចូលរួមសង្កេតការណ៍ពីអង្គភាពប្រឆាំងអំពើពុករលួយ តំណាងសាកវិទ្យាល័យចំនួន១០ និងសាធារណៈជនជាដើមនោះ។ ការអនុញ្ញាតឱ្យភាគីពាក់ព័ន្ធចូលរួមសង្កេតការណ៍នេះ គឺដើម្បីធានាតម្លាភាពជូនបេក្ខជនដែលបានចូលរួមប្រឡងប្រជែង។ លើសពីនេះ ឯកឧត្តមបានលើកឡើងពីនិតិវិធីនៃការកែវិញ្ញាសាផងដែរ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា ការជ្រើសរើសគ្រូបង្រៀនឯកទេសអប់រំកាយ និងកីឡា គឺជ្រើសរើសយកអ្នកចេះគឺជាប់ និងយុត្តិធម៌ ក្នុងទិសដៅកសាងធនធានមនុស្សប្រកបដោយចំណេះដឹង ជំនាញ សីលធម៌ និងសុខភាពល្អ។ លោកជំនាវបន្តថា មុខវិជ្ជាវិជ្ជាអប់រំកាយ និងកីឡា បានផ្តល់ផលប្រយោជន៍ សម្រាប់សិស្សានុសិស្សអាចមានស្មារតីធ្វើការជាក្រុម និងមានសុខភាពល្អជាដើម។
ពាក់ព័ន្ធនឹងការប្រឡងនេះដែរ អ្នកចូលរួមសង្កេតការណ៍យល់ឃើញថា ដំណើការប្រឡងប្រជែង និងកែវិញ្ញាសាប្រឡង គឺធ្វើឡើងអាចទទួលយក និងត្រឹមត្រូវតាមនីតិវិធីផ្សេងៗដែលគ្រោងទុក។
ការប្រឡងជ្រើសរើសគ្រូបង្រៀន ឯកទេសអប់រំកាយ និងកីឡា គឺមានបេក្ខជនចូលរួមប្រឡងជិត ២០០០នាក់ ដោយក្នុងនោះបេក្ខជនដាក់ពាក្យសម្រាប់កម្រិតមូលដ្ឋាន១២+ ២ មានចំនួនជាង ១ពាន់នាក់ និងបេក្ខជនថ្នាក់កម្រិតមូលដ្ឋាន១២+៤ មានចំនួន ៤៤៧នាក់។ ចំពោះចំនួនជ្រើសរើសជាប់ជាគ្រូបង្រៀនឯកទេសអប់រំកាយ និងកីឡា គឺកំណត់យកត្រឹមតែ ១០០នាក់ប៉ុណ្ណោះ។ ការប្រឡងប្រជែងជ្រើសរើសគ្រូបង្រៀន ឯកទេសអប់រំកាយ និងកីឡា ត្រូវប្រឡងលើវិញ្ញាសា០២ ប្រភេទ គឺវិញ្ញាសាសរសេរ និងវិញ្ញាសាអនុវត្តន៍កីឡា។ ហើយលទ្ធផលនៃការប្រឡងគ្រោងនឹងធ្វើឡើងនៅថ្ងៃទី៥ ខែកុម្ភៈ ឆ្នាំ២០២៤៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
