​​ប្រណាំង​កង់៖ ​កីឡាករ​ប៊ែ​ល​ហ្ស៊ិ​ក Tim Merlier បាន​ប្រជែង​ឈ្នះ​ការប្រកួត​ដំណាក់កាល​ទី៣ នៃ​ព្រឹត្តិការណ៍​ប្រណាំង​កង់ Grand Tour, Tour de France តែ​កីឡាករ​ហូ​ឡង់ Mathieu van der Poel នៅតែ​បន្ត​នាំមុខ​រួម​ដដែល​។

​​ដំណាក់កាល​ទី៣ ដែល​មាន​ចម្ងាយ​ផ្លូវ ១៨២.៩​គីឡូម៉ែត្រ កីឡាករ​របស់​ក្រុម Alpecin-Fenix រូប​នេះ​បាន​មក​ដល់​ទី​ព្រ័ត្រ​មុនគេ​ចំណាយ​ពេល ៤ម៉ោង ២៨នាទី ១វិនាទី តាម​ពីក្រោយ​ដោយ​មិត្ត​រួម​ជាតិ និង​ជា​មិត្ត​រួម​ក្រុម Jasper Philipsen និង​លេខ៣ កីឡាករ​បារាំង Nacer Bouhanni ពោល​គឺ​អ្នក​ទាំង៣ ​សុទ្ធ​តែ​មាន​ថេរវេលា​ដូចគ្នា​ទាំងអស់​។ ​យ៉ាង​ណាក្តី​ក្រោយ ៣ដំណាក់កាល​នេះ កីឡាករ​ហូ​ឡង់ Mathieu van der Poel ដែល​ឈ្នះ​ដំណាក់កាល​ទី២ នោះ និង​បាន​លេខ៧ នៅ​ដំណាក់កាល​ទី៣ នេះនៅតែ​បន្ត​នាំ​មុខ​គេ​ក្នុង​តារាង​វេលា​រួម​ដដែល ​មាន​វេលា​ចំណេញ ៨វិនាទី​ពីលើ​អ្នក​លេខ២ កីឡាករ​បារាំង Julian Alaphilippe និង​លេខ៣ កីឡាករ​អេ​ក្វា​ដ័​រ Richard Carapaz យឺត​ជាង​អ្នក​នាំមុខ ៣១វិនាទី​។ ​សំរាប់​ដំណាក់កាល​ទី៤ ថ្ងៃ​អង្គារ​នេះ​មាន​ចម្ងាយ​ផ្លូវ ១៥០.៤​​គីឡូម៉ែត្រ ដែល​ជា​ដំណាក់​កាល​ប្រណាំង​លើ​ស្ថានភាព​ផ្លូវ​រាបស្មើ​ធម្មតា​៕

​អត្ថបទ​៖​នាង សុភា​វុ​ធ