ស៊ីរី៖ ​កងទ័ព​សហរដ្ឋអាមេរិក​បាន​រង​ការ​បាញ់​ប្រហារ​ ដោយ​គ្រាប់​រ៉ូ​កែ​ត​នៅ​ក្នុង​ប្រទេស​ស៊ី​រី​កាលពី​ថ្ងៃ​ចន្ទ ​ប៉ុន្តែ​បាន​រួច​ផុត​ពី​ការ​រង​របួស​នៅ​ក្នុង​សកម្មភាព​ ដែល​ទំនង​ជា​ការ​សងសឹក​ ចំពោះ​ការ​វាយ​ប្រហារ​របស់​ស​ហ​រដ្ឋ​អាមេរិក​កាលពី​ចុង​សប្តាហ៍​ ប្រឆាំង​នឹង​កងជីវពល​ដែល​មាន​សម្ព័ន្ធ​ភាព​ជាមួយ​អ៊ីរ៉ង់​នៅ​ស៊ី​រី ​និង​អ៊ីរ៉ាក់​។​

​អ្នកនាំពាក្យ​យោធា​សហរដ្ឋអាមេរិក​ម្នាក់​បាន​និយាយ​ថា ​កងកម្លាំង​សហរដ្ឋអាមេរិក​ត្រូវ​បាន​រង​ការ​វាយ​ប្រហារ​ដោយ​រ៉ូ​កែ​ត​ជាច្រើន​គ្រាប់ ប៉ុន្តែ​មិនបាន​ផ្តល់​ព័ត៌មាន​លម្អិត​ទេ​។​ ​លោក​វរសេនីយ៍ទោ Wayne Marotto បាន​និយាយ​ថា មិន​មាន​អ្នក​រង​របួស និង​ការខូចខាត​ត្រូវ​បាន​គេ​វាយតម្លៃ​នោះ​ទេ​។ យើង​នឹង​ផ្តល់​ព័ត៌មាន​ថ្មីៗ​នៅ​ពេល​ដែល​យើង​មាន​ព័ត៌មាន​បន្ថែម។​ ប្រភព​នៅ​តំបន់ Deir al Zor ភាគ​ខាងកើត​ប្រទេស​ស៊ី​រី​បាន​និយាយ​ថា ​ក្រុម​ជីវពល​ដែល​គាំទ្រ​ដោយ​អ៊ីរ៉ង់ ​បាន​បាញ់​កាំភ្លើង​ធំ​ពីរ​បី​គ្រាប់​នៅ​ក្បែរ​តំបន់​ប្រេង al Omar គ្រប់គ្រង​ដោយ​កម្លាំង​ប្រជាធិបតេយ្យ​ស៊ី​រី​ដែល​គាំទ្រ​ដោយ​សហរដ្ឋអាមេរិក​។​ ​កងជីវពល​អ៊ីរ៉ាក់​ដែល​គាំទ្រ​ដោយ​អ៊ីរ៉ង់​ បាន​ប្ដេជ្ញា​សងសឹក​ចំពោះ​ការវាយប្រហារ​តាម​អាកាស​របស់​អាមេរិក ​ហើយ​បាន​និយាយ​នៅ​ក្នុង​សេចក្ដីថ្លែងការណ៍​រួម​មួយ​ថា ​ពួកគេ​នឹង​បន្ត​ដាក់​គោល​ដៅ​លើ​កងកម្លាំង​សហរដ្ឋអាមេរិក​។​

ពួកគេ​បាន​និយាយ​ថា​ “យើង​…​នឹង​សងសឹក​បំណុល​​ឈាម​នៃ​ពួក​ទុក្ករបុគ្គល​សុចរិត​របស់​យើង ​ប្រឆាំង​នឹង​ជនល្មើស​ឧក្រិដ្ឋកម្ម​ដ៏​សាហាវ​នេះ ហើយ​ដោយមាន​ជំនួយ​ពី​ព្រះ​ យើង​នឹង​ធ្វើ​ឱ្យ​ខ្មាំង​សត្រូវ​ភ្លក់​រស់​ជាតិ​ល្វីង​ជូរចត់​ នៃ​ការ​សង​សឹក​របស់​យើង​។ ​ប៉ុន្មាន​ម៉ោង​មុន​នេះ​ រដ្ឋមន្ត្រី​ក្រសួង​ការ​បរទេស​សហរដ្ឋអាមេរិក ​លោក Antony Blinken និង​សេត​វិមាន​បាន​ការពារ​ការ​វាយ​ប្រហា​រ​ របស់​សហរដ្ឋអាមេរិក​នៅ​អ៊ីរ៉ាក់​ និង​ស៊ី​រី​កាលពី​ថ្ងៃអាទិត្យ​ ដែល​ជា​មធ្យោបាយ​មួយ​ដើម្បី​កាត់បន្ថយ​ហានីភ័យ​នៃ​ជម្លោះ​៕

អត្ថបទ៖ សុខមាន