ទីភ្នាក់ងារអវកាសរបស់ប្រទេស បាននិយាយនៅថ្ងៃចន្ទនេះថា ការស៊ើបអង្កេតលើឋានព្រះច័ន្ទរបស់ប្រទេសជប៉ុនដែលត្រូវបានផ្អាកប្រតិបត្តិការ បន្ទាប់ពីការចុះចតលើឋានព្រះចន្ទនៅពេលដំបូង ដោយសារបន្ទះពន្លឺព្រះអាទិត្យរបស់វាមិនបានផលិតអគ្គិសនីពីព្រះអាទិត្យ បានចាប់ផ្តើមដំណើរការវិញហើយ។ ទីភ្នាក់ងាររុករកអវកាសប្រទេសជប៉ុន (JAXA) បាននិយាយថា វាត្រូវបានគេជឿថា បន្ទះស្រូបពន្លឺព្រះអាទិត្យ របស់យានចុះចត Smart Lander សម្រាប់ការស៊ើបអង្កេតឋានព្រះចន្ទ ឬ SLIM បច្ចុប្បន្ននេះកំពុងដំណើរការ ហើយទីភ្នាក់ងារបានទាក់ទងជាមួយយានចុះចតតាំងពីយប់ថ្ងៃអាទិត្យ។ ទំនាក់ទំនង ជាមួយយានចុះចត Smart Lander សម្រាប់ការស៊ើបអង្កេតឋានព្រះចន្ទ(SLIM) ត្រូវបានបង្កើតឡើងដោយជោគជ័យកាលពីយប់ថ្ងៃអាទិត្យ ហើយប្រតិបត្តិការបានបន្ត។ ទីភ្នាក់ងាររុករកអវកាសប្រទេសជប៉ុន (JAXA) បានបង្ហោះនៅលើគណនីបណ្តាញសង្គមផ្លូវការរបស់ខ្លួន សម្រាប់ការស៊ើបអង្កេតឋានព្រះចន្ទ នៅព្រឹកថ្ងៃច័ន្ទនេះ។ យោងតាមទីភ្នាក់ងារ JAXA បានឲ្យដឹងថា យានចុះចត បានបន្តការរុករកផ្ទៃព្រះចន្ទ ជាមួយនឹងការសង្កេតតាមបែបវិទ្យាសាស្ត្រដោយចាប់ផ្តើមភ្លាមៗជាមួយកាំមេរ៉ា Multi-Band Camara នៅលើយាន។ រូបភាពមួយ បង្ហាញពីថ្មមួយដុំ មានឈ្មោះថា «Toy Poodle» ត្រូវបានគេសង្កេតឃើញនៅជិតការស៊ើបអង្កេតដែលត្រូវបានបង្ហោះតាមបណ្តាញអ៊ីនធឺណិត។ យានចុះចត Smart Lander សម្រាប់ការស៊ើបអង្កេតឋានព្រះចន្ទ(SLIM) ត្រូវបានគេដាក់ឈ្មោះថា «អ្នកលបបាញ់ព្រះចន្ទ» បានចុះចតនៅលើឋានព្រះចន្ទ នៅម៉ោង ១២:២០ នាទីរំលងអាធ្រាត ម៉ោងក្នុងស្រុក កាលពីថ្ងៃទី ២០ ខែមករា ធ្វើឱ្យប្រទេសជប៉ុនក្លាយជាប្រទេសទី ៥ លើពិភពលោក ដែលបានចុះចតយានអវកាសនៅលើឋានព្រះចន្ទ។ ខណៈបន្ទះសូឡារបស់វា មិនបានបង្កើតចរន្តអគ្គិសនី យានចុះចតនេះ បានរលត់នៅម៉ោង ២:៥៧ នាទី ថ្ងៃទី ២២ ខែមករា បន្ទាប់ពីធ្វើការលើអាគុយបម្រុង។ រ៉ុក្កែតដែលផ្ទុកយានចុះចត Smart Lander សម្រាប់ការស៊ើបអង្កេតឋានព្រះចន្ទ(SLIM)  ត្រូវបានបាញ់បង្ហោះកាលពីថ្ងៃទី ៧ ខែកញ្ញា ពីមជ្ឈមណ្ឌលអវកាស តាណេហ្គាស្សីម៉ា(Tanegashima) នៅភាគនិរតី ប្រទេសជប៉ុន នៅក្នុងការប៉ុនប៉ងលើកទីបីរបស់ប្រទេសនេះ ក្នុងការចុះចតនៅឋានព្រះចន្ទ។