អគ្គលេខាធិការរងអង្គការសហប្រជាជាតិទទួលបន្ទុកការគាំទ្រផ្នែកប្រតិបត្តិការ លោក Atul Khare បានបញ្ចប់ដំណើរទស្សនកិច្ចរយៈពេលបីថ្ងៃទៅកាន់ប្រទេសសូម៉ាលី ដោយបានបញ្ជាក់លើតម្រូវការសម្រាប់មូលនិធិបន្ថែម ដើម្បីគាំទ្រដល់កងកម្លាំងសន្តិសុខប្រទេសសូម៉ាលី។ លោក Khare បានទទួលស្គាល់ដៃគូអន្តរជាតិដែលរួមចំណែកដល់មូលនិធិ Trust Fund គ្រប់គ្រងដោយអង្គការសហប្រជាជាតិ និងបានអំពាវនាវសុំធនធានបន្ថែមទៀត ដើម្បីជំរុញកិច្ចខិតខំប្រឹងប្រែងរក្សាស្ថិរភាពនៅក្នុងប្រទេសសូម៉ាលី។ លោក Khare បាននិយាយនៅក្នុងសេចក្តីថ្លែងការណ៍ ដែលចេញនៅទីក្រុង Mogadishu រដ្ឋធានី ប្រទេសសូម៉ាលីថា លោកសូមអំពាវនាវដល់រដ្ឋសមាជិកទាំងអស់របស់អង្គការសហប្រជាជាតិ ចូលរួមចំណែកដល់មូលនិធិ Trust Fund ។ លោកបានបញ្ជាក់លើតួនាទីដ៏សំខាន់ដែលមានរបស់ការិយាល័យផ្តល់ជំនួយរបស់អង្គការសហប្រជាជាតិនៅប្រទេសសូម៉ាលី (UNSOS) ដែលបាននិងកំពុងគាំទ្រយ៉ាងសកម្មដល់រដ្ឋាភិបាល ក្នុងការពង្រឹងសមត្ថភាពរបស់កងកម្លាំងសន្តិសុខប្រទេសសូម៉ាលី និងជនស៊ីវិល ក្នុងវិស័យសំខាន់ៗដូចជាអាកាសចរណ៍ស៊ីវិល ការគ្រប់គ្រងខ្សែសង្វាក់ផ្គត់ផ្គង់ ការព្យាបាលបន្ទាន់ និងការសង្គ្រោះផ្នែកវេជ្ជសាស្រ្ត។ លោក Khare និយាយថា យើងមានក្តីសង្ឃឹមដ៏មុតមាំសម្រាប់ប្រទេសសូម៉ាលី ហើយលោក មានទំនុកចិត្តថា ពួកគេនឹងកសាងលើសមិទ្ធិផលដែលបានធ្វើកន្លងមក និងឈានដល់ដំណាក់កាលសំខាន់ជាច្រើនទៀត។ អង្គការ UNSOS ត្រូវបានគេរំពឹងថា នឹងបង្កើនចំនួនកងកម្លាំងសន្តិសុខនៅសូម៉ាលី ដែលគាំទ្រដោយមូលនិធិ Trust Fund សូម៉ាលី ដល់ ១៨.៩០០នាក់ ពីចំនួន ១៥.៩០០នាក់ ដោយបានចាប់ផ្តើមពីខែវិច្ឆិកា ឆ្នាំ ២០២៣ ស្របតាមសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ។មន្ត្រីអង្គការសហប្រជាជាតិ ដែលបានជួបពិភាក្សាជាមួយមន្ត្រីជាន់ខ្ពស់រដ្ឋាភិបាល អង្គការសហប្រជាជាតិ និងបេសកកម្មផ្លាស់ប្តូរសហភាពអាហ្វ្រិកនៅប្រទេសសូម៉ាលី (ATMIS) ដែលបានបន្ថែមតួនាទីនៅពេលអនាគតរបស់អង្គការ UNSOS នឹងត្រូវបានកំណត់ជាផ្នែកមួយនៃការពិភាក្សាក្រោយឆ្នាំ ២០២៤ ស្តីពីការរៀបចំសន្តិសុខនៅក្នុងប្រទេសសូម៉ាលី និង សេចក្តីសម្រេចរបស់ក្រុមប្រឹក្សាសន្តិសុខ។