ជំហរអះអាងមិនរាថយរបស់ប្រទេសចិន នៅក្នុងសមុទ្រចិនខាងត្បូង និងការកើនឡើងនៃអំពើហិង្សា នៅសហភាពមីយ៉ាន់ម៉ា គឺជារបៀបវារៈធំជាងគេបំផុត សម្រាប់កិច្ចប្រជុំអ្នកការទូតប្លុកអាស៊ីអាគ្នេយ៍ នៅប្រទេសឡាវ នាថ្ងៃចន្ទ (ទី២៩ ខែមករា) នេះ ដោយការជួបប្រជុំគ្នានេះ គឺជាកិច្ចប្រជុំកម្រិតខ្ពស់លើកដំបូងរបស់សមាគមប្រជាជាតិអាស៊ីអាគ្នេយ៍ (អាស៊ាន) គិតចាប់តាំងពីប្រទេសឡាវចូលកាន់តំណែងជាប្រធានប្តូរវេន។

អ្នកការទូតតំណាងឲ្យប្រទេសទាំង ១០ ដែលមានប្រជាជនរួមបញ្ចូលគ្នាជិត ៦៥០លាននាក់ និងផលិតផលក្នុងស្រុកសរុប ឬ GDP ជាង ៣សែនកោដិដុល្លារ នឹងធ្វើការដើម្បីបង្កើតយុទ្ធសាស្ត្រស្ដីពីបញ្ហាសន្តិភាព សន្តិសុខ និងស្ថិរភាព ក្នុងតំបន់។ ប្រមុខការទាំងទាំងអស់ក៏កំពុងពិភាក្សាអំពីកិច្ចសហប្រតិបត្តិការសេដ្ឋកិច្ច និងបញ្ហាផ្សេងៗទៀត ក្រោមប្រធានបទ «លើកកម្ពស់ការតភ្ជាប់ និងភាពធន់»។

ក្នុងចំណោមបណ្ដាប្រទេសសមាជិកអាស៊ាន ដែលមានឥណ្ឌូនេស៊ី ថៃ សិង្ហបូរី ហ្វីលីពីន វៀតណាម ម៉ាឡេស៊ី មីយ៉ាន់ម៉ា កម្ពុជា ប្រ៊ុយណេ និងឡាវ ប្រទេសមួយចំនួនមានជម្លោះទាមទារដែនសមុទ្រ នៅសមុទ្រចិនខាងត្បូងជាមួយប្រទេសចិន។ ប្រទេសចិនទាមទារស្ទើរតែទាំងស្រុងនៃដឺនទឹកនៃសមុទ្រចិនខាងត្បូង ដែលតាមការប៉ាន់ស្មានទឹកប្រាក់ប្រមាណ ៥សែនកោដិដុល្លារបានពីពាណិជ្ជកម្មអន្តរជាតិឆ្លងកាត់ផ្លូវនេះជារៀងរាល់ឆ្នាំ ដែលនេះបាននាំឲ្យឈានទៅរកការប្រឈមមុខដាក់គ្នាដោយផ្ទាល់រវាងប្រទេសទាំងនោះ ជាពិសេសបំផុតនោះ ជាមួយហ្វីលីពីន និងវៀតណាម។

នៅក្នុងសេចក្តីថ្លែងការណ៍របស់ខ្លួន ឡាវលើកឡើងថា អាស៊ានបានពិភាក្សាអំពីកង្វល់នៃ «ការទាមទារទឹកដីឡើងវិញ សកម្មភាពនានា ឧប្បត្តិហេតុធ្ងន់ធ្ងរ នៅក្នុងតំបន់ រួមទាំងសកម្មភាពដែលធ្វើឲ្យសុវត្ថិភាពរបស់មនុស្សទាំងអស់ស្ថិតក្នុងហានិភ័យ» និង «បានសង្កត់ធ្ងន់លើសារៈសំខាន់នៃការមិនធ្វើទំនើបកម្មយោធា និងការអត់ធ្មត់ ក្នុងសកម្មភាពទាំងអស់របស់អ្នកទាមទារ។ ជាមួយគ្នានេះ ឡាវគឺជាប្រទេសអាស៊ានដំបូងគេដែលមានព្រំដែនជាប់សហភាពមីយ៉ាន់ម៉ា ដែលបានធ្វើជាប្រធាន ចាប់តាំងពីរបបយោធាប្រទេសនេះបានដណ្តើមអំណាចក្នុងខែកុម្ភៈ ឆ្នាំ២០២១ ពីរដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី Aung San Suu Kyi។

សហភាពមីយ៉ាន់ម៉ាត្រូវបានហាមឃាត់មិនឲ្យបញ្ជូនរដ្ឋមន្ត្រីការបរទេសរបស់ខ្លួន ឬតំណាងនយោបាយណាមួយទៅចូលរួមកិច្ចប្រជុំអាស៊ាននោះឡើយ ចាប់តាំងពីចុងឆ្នាំ២០២១ នៅពេលដែលប្រទេសនេះរារាំងបេសកជនរបស់ប្លុកមិនឲ្យទៅជួបជាមួយលោកស្រី Suu Kyi។ ហើយនៅហ្លួងព្រះបាង ប្រទេសនេះត្រូវបានតំណាងដោយមន្ត្រីក្រសួងការបរទេសដែលមិនពាក់ព័ន្ធនយោបាយជំនួសវិញ៕