បើយោងតាមប្រព័ន្ធផ្សព្វផ្សាយនានារបស់ចិន បានឲ្យដឹងថា ប្រទេសចិន បានអនុម័តគំរូបញ្ញាសិប្បនិម្មិត (AI) ជាង ៤០ ដើម្បីឲ្យប្រើប្រាស់ជាសាធារណៈ ក្នុងរយៈពេល ៦ខែដំបូង ចាប់តាំងពីអាជ្ញាធរ បានចាប់ផ្តើមដំណើរការយល់ព្រម ខណៈដែលប្រទេសនេះ ព្យាយាមតាមឲ្យទាន់សហរដ្ឋអាមេរិក ក្នុងការអភិវឌ្ឍន AI។

បើតាមការរាយការណ៍របស់សារព័ត៌មាន Securities Times ដែលគាំទ្រដោយរដ្ឋរបស់ចិន បានឲ្យដឹងថា និយតករចិន បានផ្តល់ការយល់ព្រមដល់គំរូភាសាធំសរុបចំនួន ១៤ (LLM) សម្រាប់ការប្រើប្រាស់ជាសាធារណៈ កាលពីសប្តាហ៍មុន។ នេះគឺជាការអនុម័តលើកទី៤ ដែលប្រទេសចិនបានផ្តល់ឲ្យ ដែលរាប់បញ្ចូលក្រុមហ៊ុនសាជីវកម្ម Xiaomi Corp, 4Paradigm និង 01.AI ក្នុងចំណោមអ្នកទទួលបាន។

ទីក្រុងប៉េកាំង បានចាប់ផ្តើមតម្រូវឲ្យក្រុមហ៊ុនបច្ចេកវិទ្យា ទទួលបានការយល់ព្រមពីនិយតករ ដើម្បីបើកឲ្យប្រើប្រាស់ LLM របស់ពួកគេជាសាធារណៈ កាលពីខែសីហាឆ្នាំមុន។ ទីក្រុងនេះ បានគូសបញ្ជាក់អំពីវិធីសាស្រ្តរបស់ប្រទេសចិនឆ្ពោះទៅរកការអភិវឌ្ឍបច្ចេកវិទ្យា AI ខណៈពេលដែលខិតខំរក្សាឲ្យស្ថិតនៅក្រោមការត្រួតពិនិត្យ និងការគ្រប់គ្រងរបស់ខ្លួន។

ទីក្រុងប៉េកាំងបានអនុម័តគំរូ AI ដំបូងរបស់ខ្លួន នៅក្នុងខែសីហា ភ្លាមៗបន្ទាប់ពីដំណើរការយល់ព្រមត្រូវបានអនុម័ត។ ក្រុមហ៊ុន Baidu, Alibaba និង ByteDance គឺជាក្រុមហ៊ុនដំបូងគេរបស់ប្រទេសចិនដែលទទួលបានការយល់ព្រម។

បន្ទាប់មក និយតករចិន បានផ្តល់ការយល់ព្រមចំនួន ២បន្ថែមទៀត នៅក្នុងខែវិច្ឆិកា និងខែធ្នូ មុនពេលក្រុមផ្សេងទៀត ត្រូវបានផ្តល់ការអនុញ្ញាត ក្នុងខែនេះ។ ខណៈពេលដែលរដ្ឋាភិបាល មិនបានបង្ហាញពីបញ្ជីពិតប្រាកដនៃក្រុមហ៊ុនដែលត្រូវបានអនុម័ត សម្រាប់ការត្រួតពិនិត្យជាសាធារណៈនោះ ហើយសារព័ត៌មាន Securities Times បានឲ្យដឹងកាលពីថ្ងៃអាទិត្យ (ទី២៨ ខែមករា) ថា គំរូ AI ជាង ៤០ ត្រូវបានអនុម័ត៕