អតីតរដ្ឋមន្ត្រីក្រសួងហិរញ្ញវត្ថុម៉ាឡេស៊ី លោក Daim Zainuddin នៅថ្ងៃចន្ទ (ទី២៩ ខែមករា) នេះ បានសារភាពពីភាពគ្មានទោសពៃរ៍ ចំពោះការខកខានមិនបានលាតត្រដាងពីទ្រព្យសម្បត្តិ នៅក្រោមច្បាប់ប្រឆាំងអំពើពុករលួយ ដែលជាករណីមួយ ក្នុងចំណោមករណីដ៏លេចធ្លោបំផុត ក្នុងយុទ្ធនាការបង្ក្រាបអំពើពុករលួយ ពាក់ព័ន្ធនឹងឥស្សរជនជាន់ខ្ពស់។

នាយករដ្ឋមន្ត្រីលោក Anwar Ibrahim បានប្តេជ្ញាថា នឹងប្រយុទ្ធប្រឆាំងអំពើពុករលួយ ទោះបីជាអ្នករិះគន់បានចោទប្រកាន់លោកថា បានប្រើប្រាស់ទីភ្នាក់ងារប្រឆាំងអំពើពុករលួយនេះ ដើម្បីកំណត់គោលដៅគូប្រជែងនយោបាយក៏ដោយ ពោលគឺជាការចោទប្រកាន់ដែលលោកបានបដិសេធ។

លោក Daim វ័យ ៨៥ឆ្នាំ ដែលជាសម្ព័ន្ធមិត្តរបស់មេដឹកនាំចាស់វស្សា និងជាគូបដិបក្ខជាយូរយារណាស់មកហើយរបស់លោក Anwar គឺលោក Mahathir Mohamad ស្ថិតក្នុងចំណោមបណ្ដាឥស្សរជនដែលកំពុងត្រូវបានស៊ើបអង្កេតដោយគណៈកម្មការប្រឆាំងអំពើពុករលួយម៉ាឡេស៊ី (MACC) ពីបទសង្ស័យកាន់កាប់ទ្រព្យសម្បត្តិច្រើនជាងការប្រកាសឲ្យដឹង។

ភរិយារបស់លោក Daim គឺលោកស្រី Na'imah Abdul Khalid ត្រូវបានចោទប្រកាន់កាលពីសប្តាហ៍មុនពីបទខកខានមិនបានបង្ហាញទ្រព្យសម្បត្តិ ខណៈដែល MACC បានស្នើឲ្យកូនប្រុសដែលជាអ្នកជំនួញរបស់លោក Mahathir គឺលោក Mirzan និងលោក Mokhzani ប្រកាសទ្រព្យសម្បត្តិរបស់ពួកគេ។ តំណាងក្រុមគ្រួសាររបស់លោក Mahathir មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់សារព័ត៌មាន Reuters តែទោះជាយ៉ាងណា អតីតនាយករដ្ឋមន្ត្រីបានហៅការស៊ើបអង្កេតនេះថា មានហេតុផលនយោបាយ។

លោក Daim ដែលធ្លាប់បម្រើការជារដ្ឋមន្ត្រីហិរញ្ញវត្ថុពីឆ្នាំ១៩៨៤ ដល់ឆ្នាំ១៩៩១ និងពីឆ្នាំ១៩៩៩ ដល់ឆ្នាំ២០០១ បានចូលទៅតុលាការ នៅថ្ងៃចន្ទ (ទី២៩ ខែមករា) នេះ ដោយអង្គុយក្នុងរទេះរុញ ហើយត្រូវបានអនុញ្ញាតឲ្យនៅក្រៅឃុំ បន្ទាប់ពីមេធាវីរបស់លោកបានលើកឡើងពីបញ្ហាសុខភាព។

លោកត្រូវបានចោទប្រកាន់ពីបទខកខានមិនបានប្រកាសទ្រព្យសម្បត្តិ ដែលពាក់ព័ន្ធនឹងក្រុមហ៊ុនចំនួន ៣៨ អចលនទ្រព្យចំនួន២៥ និងរថយន្តទំនើបៗជាច្រើនគ្រឿង។ បទចោទនេះអាចនាំឲ្យលោកជាប់ពន្ធនាគារយូរបំផុតរហូតដល់ ៥ឆ្នាំ និងពិន័យជាប្រាក់រហូតដល់ទៅ ១០០.០០០រីងហ្គីត (២១.១៦០ដុល្លារអាមេរិក)៕