តម្លៃប្រេង បានកើនឡើងនៅថ្ងៃចន្ទនេះ ដោយសារការភ័យខ្លាចថ្មីៗនៅមជ្ឈិមបូព៌ាថ្មី ខណៈដែលលោកប្រធានាធិបតីចូ បៃដិន បានសន្យាសងសឹក បន្ទាប់ពីបានស្តីបន្ទោសក្រុមឧទ្ទាមដែលគាំទ្រដោយអ៊ីរ៉ង់ចំពោះការវាយប្រហារដ៏សាហាវទៅលើទាហានអាមេរិក ខណៈដែលភាគហ៊ុន ត្រូវបានជំរុញដោយចលនាចុងក្រោយរបស់ប្រទេសចិន ដើម្បីគាំទ្រទីផ្សារ ដែលមានបញ្ហារបស់ខ្លួន។

ការវាយប្រហារដោយយានដ្រូននៅលើមូលដ្ឋានមួយ ក្នុងប្រទេសហ្ស៊កដានី ដែលបានកើតឡើងប៉ុន្មានថ្ងៃបន្ទាប់ពីក្រុមហ៊ូធីរបស់យេម៉ែនវាយប្រហារលើនាវានៅសមុទ្រក្រហម បានបង្កើនភាពតានតឹង នៅក្នុងតំបន់ និងបង្កឲ្យមានការព្រួយបារម្ភអំពីការផ្គត់ផ្គង់តាមរយៈផ្លូវទឹកពាណិជ្ជកម្មដ៏សំខាន់នេះ។

កិច្ចសន្យាប្រេងឆៅសំខាន់ៗទាំងពីរ បានកើនឡើងច្រើនជាងមួយភាគរយ នៅក្នុងការជួញដូរដំបូង ឈានដល់កម្រិតដែលមិនបានឃើញ ចាប់តាំងពីខែវិច្ឆិកា មុនពេលកាត់បន្ថយការកើនឡើងបន្តិច។

លោក Andrew Ticehurst នៅក្រុមហ៊ុន Nomura បាននិយាយថា៖«ដំណឹងនៃកងទ័ពអាមេរិកបីនាក់ត្រូវបានសម្លាប់ដោយការវាយប្រហារដោយយានដ្រូន ហើយលោកប្រធានាធិបតីបៃដិន បាននិយាយថា«យើងនឹងឆ្លើយតប» ទំនងជានឹងធ្វើឲ្យទីផ្សារផ្តោតលើតំបន់នេះ»។

ការវិឌ្ឍនេះ កើតឡើងនៅពេលដែលអ៊ីស្រាអែល បន្តធ្វើសង្គ្រាមប្រឆាំងនឹងក្រុមហាម៉ាស ដោយបន្ថែមការព្រួយបារម្ភរបស់អ្នកវិនិយោគអំពីការប៉ះទង្គិចកាន់តែធំឡើងរវាងប្រទេសអ៊ីរ៉ង់ និងសហរដ្ឋអាមេរិក។