ស្របពេលដែលមានការថ្កោលទោសពីលោកខាងលិចទៅលើការបាញ់បង្ហោះផ្កាយរណប១គ្រឿងមុននេះ ក្នុងខែនេះ ប្រព័ន្ធផ្សព្វផ្សាយរដ្ឋបានរាយការណ៍ថា ប្រទេសអ៊ីរ៉ង់បានចាប់ផ្ដើមបាញ់បង្ហោះផ្កាយរណបបីគ្រឿងព្រមៗគ្នាលើកដំបូងកាលពីថ្ងៃអាទិត្យដោយប្រើប្រាស់យានចម្លងដឹកផ្កាយរណបឈ្មោះ ស៊ីម៉័រ(Simorgh) ដែលអភិវឌ្ឍន៍ដោយក្រសួងការពារជាតិ។

សេចក្ដីរាយការណ៍ បាននិយាយថា ផ្កាយរណប១គ្រឿង ទម្ងន់៣២គីឡូក្រាម និង ពីរគ្រឿងទៀតជាផ្កាយរណបណាណូ (nano-satellite)ក្នុង១គ្រឿងៗមានទម្ងន់មិនតិចជាង១០គីឡូក្រាម ត្រូវបានគេបញ្ជូនអោយទៅស្ថិត ក្នុងលំហចម្ងាយ៤៥០គីឡូម៉ែត្រជាមួយនឹងឧបករណ៍តូចចំនួនពីរ ដែលមានគោលបំណង ធ្វើការសាកល្បងពីការទំនាក់ទំនងបញ្ជូនទិន្នន័យ និងការកំណត់ទីតាំងភូមិសាស្រ្ដ។

ផ្កាយធំជាងគេ មានឈ្មោះ ម៉ាដា(Mahda) ដែលត្រូវបានស្ថាបនាឡើងដោយទីភ្នាក់ងារអវកាសរបស់ប្រទេសអ៊ីរ៉ង់ មានគោលបំណងដើម្បីធ្វើការសាកល្បងពីភាពជាក់លាក់របស់យានចម្លង ស៊ីម៉័រ(Simorgh)ដែលកំពុងដឹកជញ្ជូនឧបករណ៍ពហុមុខងាទៅកាន់ទីអវកាស៕

គួរំលឹកថា ប្រទេសអ៊ីរ៉ង់ បានចាប់ផ្ដើមបាញ់បង្ហោះផ្កាយរណបរបស់ខ្លួនឈ្មោះ សូរ៉ាយ៉ា(Soraya)ចូលក្នុង លំហអាកាសនៅខែនេះ ដែលនាំអោយមានការថ្កោលទោសពីប្រទេសបារាំង អង់គ្លេស និងអាល្លឺម៉ង់ដែល បាននិយាយថា ការចាប់ផ្ដើមបច្ចេកវិទ្យារូបយន្ដក្នុងទីអវកាសនោះ អាចត្រូវបានគេប្រើប្រាស់សម្រាប់ការ អភិវឌ្ឍន៍ប្រព័ន្ធមីស៊ីលបាលីស្ទីករយៈចម្ងាយឆ្ងាយ៕