នាយករដ្ឋមន្ត្រីអ៊ីតាលី លោកស្រី Giorgia Meloni បានស្វាគមន៍មេដឹកនាំអាហ្វ្រិកជាង ២០នាក់ នាទីក្រុងរ៉ូម នៅថ្ងៃចន្ទ (ទី២៩ ខែមករា) នេះ ដើម្បីបង្ហាញពីផែនការដែលទន្ទឹងរង់ចាំជាយូរមកហើយរបស់លោកស្រី ក្នុងគោលបំណងកំណត់ទំនាក់ទំនងរបស់ប្រទេសអ៊ីតាលីឡើងវិញជាមួយទ្វីបនេះ និងទប់ស្កាត់ការធ្វើអន្តោប្រវេសន៍។

កិច្ចប្រជុំកំពូលដែលត្រូវបានរៀបចំឡើងនៅឯព្រឹទ្ធសភាដ៏ស្រស់ស្អាតរបស់អ៊ីតាលី នឹងមានរយៈពេលពេញមួយថ្ងៃ ដោយបណ្ដារដ្ឋមន្ត្រីអ៊ីតាលី គ្រោងនឹងសង្ខេបនូវគំនិតផ្តួចផ្តើមជាច្រើន រាប់ចាប់ពីថាមពល និងហេដ្ឋារចនាសម្ព័ន្ធ រហូតដល់សុខភាព និងការអប់រំ ដែលលោកស្រី Meloni និយាយថា នឹងមានអត្ថប្រយោជន៍ចំពោះគ្នាទៅវិញទៅមក។

លោកស្រី Meloni បានលើកឡើងនៅក្នុងសុន្ទរកថាបើកថា៖ «យើងជឿថា វាអាចទៅរួចក្នុងការស្រមៃ និងសរសេរជំពូកថ្មីមួយ នៅក្នុងប្រវត្តិសាស្រ្តនៃទំនាក់ទំនងរបស់យើង ដែលជាកិច្ចសហប្រតិបត្តិការ ក្នុងចំណោមភាពស្មើគ្នា ខុសពីការដាក់ទណ្ឌកម្មជញ្ជក់ឈាម ឬជំហរសប្បុរសធម៌ ចំពោះទ្វីបអាហ្រ្វិក»។

លោកស្រីបាននិយាយថាគំនិតផ្តួចផ្តើមនេះ នឹងមានការផ្ដល់អំណោយដំបូងចំនួនជាង ៥,៥ពាន់លានអឺរ៉ូ (៥,៩៥ពាន់លានដុល្លារ) ក្នុងនោះរួមទាំងការធានាសាធារណៈ សម្រាប់គម្រោងវិនិយោគ និង ៣ពាន់លានអឺរ៉ូពីមូលនិធិអាកាសធាតុអន្តរជាតិដែលបានបង្កើតឡើងក្នុងឆ្នាំ២០២១ ផងដែរ។

តែទោះជាយ៉ាងណាក៏ដោយ អ្នករិះគន់និយាយថា អ៊ីតាលីដែលជំពាក់បំណុលគេច្រើន មិនអាចមានសង្ឃឹមប្រកួតប្រជែងជាមួយប្រទេសផ្សេងៗ ដូចជាចិន រុស្ស៊ី និងរដ្ឋឈូងសមុទ្រ ដែលសុទ្ធតែកំពុងស្វែងរកការជំរុញវត្តមានរបស់ពួកគេនៅក្នុងទ្វីបអាហ្រ្វិក ដែលជាជម្រកនៃធនធានធម្មជាតិដ៏ច្រើនរបស់ពិភពលោក៕