បំណែកសម្លៀកបំពាក់ ស្បែកជើង និងកម្ទេចកម្ទីជាច្រើនត្រូវបានខ្ចាត់ខ្ចាយនៅសាលារៀនមួយកន្លែង ដែលកុមារចំនួន ៧នាក់ ត្រូវបានសម្លាប់នៅភាគឦសានប្រទេសនីហ៊្សេរីយ៉ា ដោយឧបករណ៍បំផ្ទុះកែច្នៃ កាលពីថ្ងៃសៅរ៍ (២៧ មករា) ដែលជនរងគ្រោះទាំងនោះច្រឡំថាជាសំណល់អេតចាយ។

កុមារចំនួន ៦នាក់ ដែលមានអាយុចន្លោះពី ៧ឆ្នាំទៅ ១១ឆ្នាំ បានរើសគ្រឿងផ្ទុះ រួមជាមួយនឹងសំណល់អេតចាយមួយចំនួន ហើយបានរក្សាទុកនៅក្នុងអគារដែលសាងសង់មិនទាន់រួចរាល់នៅសាលាអ៊ីស្លាមមួយក្នុងតំបន់ ហ្គូប៊ីអូ (Gubio) នៃរដ្ឋ ប័រណូ (Borno) ដែលជាចំណុចកណ្ដាលនៃក្រុមបះបោរអ៊ីស្លាមនិយមដ៏យូរអង្វែងមួយ។

មេភូមិក្នុងតំបន់ ហ្គូប៊ីអូ បានប្រាប់សារព័ត៌មានរ៉យទ័រ កាលពីថ្ងៃចន្ទ (២៩ មករា) ថាឧបករណ៍នោះបានផ្ទុះឡើង ខណៈក្មេងៗបានព្យាយាមលក់វាជាដែកអេតចាយទៅឱ្យក្មេងរើសអេតចាយម្នាក់អាយុ ១៥ឆ្នាំ។ អ្នកទាំង ៧នាក់នោះបានស្លាប់ក្នុងហេតុការណ៍នេះ។

សិស្សនៅសាលា ដែលបង្រៀនក្មេងៗសូត្រគម្ពីរកូរ៉ាននោះ ច្រើនតែប្រមូលដែកអេតចាយ ដើម្បីលក់ឲ្យសហគមន៍មូលដ្ឋានផ្សេងៗ៕