កំពង់ឆ្នាំង៖ ប្រជាពលរដ្ឋដែលធ្វើដំណើរឆ្លងកាត់តំបន់ផ្សារឆ្នាំង រហូតដល់ចុងកោះ ក្នុង​សង្កាត់​ផ្សារ​ឆ្នាំង ក្រុងកំពង់ឆ្នាំង បានរអ៊ូរទាំខ្លាំងទាក់ទងនឹងបញ្ហាសណ្តាប់ធ្នាប់ បរិស្ថាន និង​សោភ័ណ​ភាព ដែលធ្លាក់ចុះខ្លាំងតែម្តង ព្រោះផ្លូវនេះ ជាផ្លូវទេសចរជាតិ អន្តរជាតិ ឡើងចុះរៀងរាល់ថ្ងៃ ។ តំបន់​នេះ បានក្លាយជាគ្មានសណ្តាប់ធ្នាប់ បរិស្ថាន សោភ័ណភាព ហើយពេលនគរបាល និង​អាជ្ញាធរ​ក្រុងចុះរៀបចំ បានតែប្រនមាណ២ម៉ោង គឺពួកគេចាប់ផ្តើមពង្រាយតាមផ្លូវលើសដើម។

ប្រជាពលរដ្ឋដែលធ្វើដំណើរឆ្លងកាត់តំបន់នោះ បានសុំឱ្យអាជ្ញាធរក្រុង ខេត្ត មាន​ចំណាត់​ការ​ផ្លូវ​ច្បាប់ ព្រោះទីតាំងលក់ដូរនេះ មិនបានគោរពច្បាប់ មិនព្រមជួយរៀប​ចំ​ឱ្យ​មាន​សណ្តាប់​ធ្នាប់​ឡើយ​។ ផ្លូវនេះ ជាផ្លូវដែលភ្ញៀវទេសចរជាតិ អន្តរជាតិឆ្លងកាត់ទៅមករៀងរាល់ថ្ងៃ ដោយ​ភ្ញៀវទេសចរ​ជាតិ ចង់​ទស្សនា​ភ្នំ​នាង​កង្រី ចំណែកភ្ញៀវទេសចរអន្តរជាតិ ធ្វើដំណើរតាមកប៉ាល់​មក​ចត​នៅ​ទន្លេ​កំពង់ឆ្នាំង។ ពេលពួកគេឆ្លងកាត់ទីនោះ ពេលខ្លះមានការកកស្ទះដោយសារ​តែភាពឥត​សណ្ដាប់​ធ្នាប់​នេះ​​៕