នៅសល់១ថ្ងៃទៀតប៉ុណ្ណោះ ការប្រកាសទ្រព្យសម្បត្តិ និងបំណុល​តាមរបប ២ឆ្នាំ ជូន​អង្គភាព​ប្រឆាំង​អំពើ​ពុករលួយត្រូវបញ្ចប់ ជនណាមិនប្រកាសត្រូវផ្តន្ទាទោស។

អង្គភាពប្រឆាំងអំពើពុករលួយបានឱ្យដឹងនៅថ្ងៃទី៣០ ខែមករា ឆ្នាំ២០២៤ថា នៅសល់តែ ១ថ្ងៃ​ទៀត​ប៉ុណ្ណោះ ការប្រកាសទ្រព្យសម្បត្តិ និងបំណុល តាមរបប ២ឆ្នាំ ឆ្នាំ២០២៤ នឹងត្រូវបញ្ចប់។

អង្គភាពប្រឆាំងអំពើពុករលួយបានឱ្យដឹងដែរថា ការប្រកាសទ្រព្យសម្បត្តិ និងបំណុល តាមរបប ២ឆ្នាំ ឆ្នាំ២០២៤ ពីថ្ងៃទី១ ដល់ថ្ងៃទី៣១ ខែមករា ឆ្នាំ២០២៤ គិតត្រឹមព្រឹកថ្ងៃទី៣០ ខែមករា ​ឆ្នាំ​២០២៤ បុគ្គលដែលជាប់កាតព្វកិច្ច បានប្រកាសទ្រព្យសម្បត្តិ និងបំណុល​ជូន​អង្គភាព​ប្រឆាំង​អំពើ​ពុក​រលួយ ចំនួន ១៨.០៨៥ រូប ស្មើនឹង ៩៩.៧៤% នៃចំនួនប្រកាសសរុប ១៨.១៣២ រូប។

ក្រសួង-ស្ថាប័ន ចំនួន ២៨ និងរាជធានី-ខេត្ត ទាំង ២៥ បានបញ្ចប់ការប្រកាសរបស់ខ្លួន ១០០ % ​រីឯក្រសួង-ស្ថាប័នចំនួន ១២ ផ្សេងទៀត ក៏បានប្រកាសស្ទើរតែរួចរាល់ផងដែរ នេះបើតាម​ការ​បញ្ជាក់​ឱ្យ​ដឹង​ពីក្រុមការងារនាយកដ្ឋានប្រកាសទ្រព្យសម្បត្តិ និងបំណុល​នៃ​អង្គភាព​ប្រឆាំង​អំពើ​ពុក​រលួយ​។

អង្គភាពប្រឆាំងអំពើពុករលួយសូមឱ្យបុគ្គលដែលមិនទាន់បានប្រកាសទ្រព្យសម្បត្តិ និងបំណុល អញ្ជើញ​ទៅប្រកាសឱ្យបានរួសរាន់តាមច្បាប់កំណត់។

ជាមួយគ្នានេះ លោក ញីវ បញ្ញារិទ្ធ ប្រធាននាយកដ្ឋានប្រកាសទ្រព្យសម្បត្តិ និងបំណុល បាន​ឱ្យ​ដឹង​ថា មាត្រា ៣៨ នៃច្បាប់ស្តីពីការប្រឆាំងអំពើពុករលួយបានចែងថា ជនណា​ដែល​មិនបាន​ប្រកាស​ទ្រព្យសម្បត្តិ និងបំណុល ឬបានប្រកាសមិនត្រឹមត្រូវ​នូវ​ទ្រព្យ​សម្បត្តិ​របស់​ខ្លួន​ទៅ​តាម​បទ​ប្បញ្ញត្តិ នៃ​ច្បាប់នេះ ត្រូវផ្តន្ទាទោសដាក់ពន្ធនាគារពី ១ខែ ទៅ ១ឆ្នាំ និងពិន័យជាប្រាក់ពី មួយ​សែន​រៀល ទៅពីរលានរៀល ហើយត្រូវបានបង្ខំឱ្យធ្វើការប្រកាសទ្រព្យសម្បត្តិ ជូនអង្គភាព​ប្រឆាំង​អំពើ​ពុក​រលួយ។ ក្នុងករណី រឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេដង៕ អត្ថបទ ៖ ប្រាក់ វ៉ាន់ដា