ក្រសួងការបរទេសសហរដ្ឋអាមេរិក កាលពីថ្ងៃចន្ទ (ទី២៩ ខែមករា) បាប្រាប់ឲ្យដឹងថា ការលក់យុទ្ធោបករណ៍យោធារបស់សហរដ្ឋអាមេរិកទៅឲ្យរដ្ឋាភិបាលបរទេស ក្នុងឆ្នាំ២០២៣ បានកើនឡើង ១៦ភាគរយ ពោលគឺឡើងដល់ចំនួន ២៣៨ពាន់លានដុល្លារ ខណៈដែលប្រទេសនានាស្វែងរកការបំពេញឃ្លាំងស្តុក ដែលត្រូវបានបញ្ជូនទៅអ៊ុយក្រែន និងត្រៀមសម្រាប់ការមានជម្លោះធំៗ។

តួលេខនេះគាំទ្រដល់ការរំពឹងទុកនៃការលក់កាន់តែខ្ពស់ សម្រាប់ក្រុមហ៊ុន Lockheed Martin, General Dynamics និង Northrop Grumman ដែលភាគហ៊ុនរបស់ពួកគេត្រូវបានគេព្យាករថា នឹងហក់ឡើង ចំពេលមានការកើនឡើងនៃអស្ថិរភាពពិភពលោក។

នៅក្នុងសេចក្តីថ្លែងការណ៍របស់ខ្លួន ក្រសួងការបរទេសបានឲ្យដឹងថា ការលក់ និងបញ្ជូនអាវុធត្រូវបានចាត់ទុកថា ជា «ឧបករណ៍គោលនយោបាយការបរទេសដ៏សំខាន់របស់សហរដ្ឋអាមេរិក ជាមួយនឹងផលប៉ះពាល់រយៈពេលវែង នាពេលខាងមុខ សម្រាប់សន្តិសុខក្នុងតំបន់ និងពិភពលោក»។

ការលក់ដែលត្រូវបានអនុម័តក្នុងឆ្នាំនោះ បានរួមបញ្ចូលការលក់តម្លៃ ១០ពាន់លានដុល្លារនៃប្រព័ន្ធគ្រាប់រូក្កែតចល័តកម្រិតខ្ពស់ (HIMARS) ទៅប្រទេសប៉ូឡូញ ការលក់តម្លៃ ២,៩ពាន់លានដុល្លារនៃមីស៊ីលកម្រិតខ្ពស់បាញ់ពីអាកាសទៅអាកាសរយៈចម្ងាយមធ្យម AIM-120C-8 Advanced Medium-Range Air-to-Air Missiles (AMRAAM) ទៅប្រទេសអាល្លឺម៉ង់ និងប្រព័ន្ធមីស៊ីលការពារអាកាសកម្រិតខ្ពស់រយៈចម្ងាយមធ្យម National Advanced Surface (NASAMS) ទៅប្រទេសអ៊ុយក្រែន។

សូមបញ្ជាក់ថា មានវិធីធំៗចំនួន២ ដែលរដ្ឋាភិបាលបរទេសទិញអាវុធពីក្រុមហ៊ុនអាមេរិក ដូចជាការលក់ពាណិជ្ជកម្មដោយផ្ទាល់ដែលចរចាជាមួយក្រុមហ៊ុន ឬការលក់ឧបករណ៍យោធាបរទេសដែលរដ្ឋាភិបាលទាំងនោះជាធម្មតាទាក់ទងមន្ត្រីក្រសួងការពារជាតិ នៅស្ថានទូតអាមេរិក ក្នុងរដ្ឋធានីរបស់ខ្លួន។ វិធីទាំង ២នេះ ទាមទារការយល់ព្រមពីរដ្ឋាភិបាលសហរដ្ឋអាមេរិក។

ការលក់ឧបករន៍យោធាដោយផ្ទាល់ពីក្រុមហ៊ុនអាមេរិក បានកើនឡើងដល់ ១៥៧,៥ពាន់លានដុល្លារ ក្នុងឆ្នាំសារពើពន្ធ ២០២៣ ពោលគឺឡើងពី ១៥៣,៦ពាន់លានដុល្លារ ក្នុងឆ្នាំសារពើពន្ធ ២០២២ ខណៈដែលការលក់ដែលបានរៀបចំតាមរយៈរដ្ឋាភិបាលសហរដ្ឋអាមេរិក បានកើនឡើងដល់ ៨០,៩ពាន់លានដុល្លារក្នុងឆ្នាំ២០២៣ ដោយឡើងពី ៥១,៩ពាន់លានដុល្លារកាលពីឆ្នាំមុន៕