ប្រធានគណបក្សសហភាពប្រជាធិបតេយ្យអៀរឡង់ខាងជើង (DUP) លោក Jeffrey Donaldson នៅថ្ងៃអង្គារ (ទី៣០ ខែមករា) នេះ បានឲ្យដឹងថា ខ្លួនបានឈានដល់កិច្ចព្រមព្រៀងជាមួយរដ្ឋាភិបាលអង់គ្លេសស្តីពីប្រតិបត្តិការនៃច្បាប់ពាណិជ្ជកម្មក្រោយ Brexit (ការចាកចេញពីសហភាពអឺរ៉ុបរបស់ចក្រភពអង់គ្លេស) ដែលនឹងអនុញ្ញាតឲ្យគណបក្សនេះវិលត្រឡប់ទៅរកការបែងចែកអំណាចរដ្ឋបាលក្នុងតំបន់។

អៀរឡង់ខាងជើងបានគ្មានការផ្ទេរអំណាចរដ្ឋបាលអស់រយៈពេលជិត ២ឆ្នាំមកហើយ បន្ទាប់ពីគណបក្ស DUP បានដើរចេញពីការតវ៉ាពាក់ព័ន្ធនឹងច្បាប់ពាណិជ្ជកម្ម ដែលខ្លួនបាននិយាយថា បានបង្កើតរបាំងជាមួយតំបន់ផ្សេងទៀតរបស់ចក្រភពអង់គ្លេស និងធ្វើឲ្យប៉ះពាល់ដល់ឋានៈរបស់អៀរឡង់ខាងជើង នៅក្នុងតំបន់នោះ។

ដោយថ្លែងនៅឯសន្និសីទសារព័ត៌មានមួយ នាព្រឹកថ្ងៃអង្គារនេះ លោក Donaldson បាននិយាយថា វិធានការដែលនឹងត្រូវបានគាំទ្រដោយច្បាប់ថ្មីរបស់ចក្រភពអង់គ្លេស នឹងលុបចោលការត្រួតពិនិត្យទំនិញ ដែលចរាចរក្នុងចក្រភពអង់គ្លេស និងដែលនៅតែស្ថិតក្នុងប្រទេសអៀរឡង់ខាងជើង ហើយទទួលបានសិទ្ធិចូលដោយគ្មានរឹតត្បិត សម្រាប់ក្រុមហ៊ុនរបស់អៀរឡង់ខាងជើង ទៅកាន់ទីផ្សារចក្រភពអង់គ្លេស។

ជាមួយគ្នានេះ លោកបាននិយាយថា ទីក្រុងឡុងដ្រ៍នឹងចេញផ្សាយព័ត៌មានលម្អិតនៃកិច្ចព្រមព្រៀង ក្នុងពេលវេលាសមរម្យ ហើយបន្ថែមថា លោកជឿថា វាអាចដំណើរការបានយ៉ាងឆាប់រហ័ស ដើម្បីឲ្យគណបក្ស DUP ទទួលបានកៅអីរបស់ខ្លួនវិញ នៅក្នុងសភា Stormont របស់ទីក្រុង Belfast៕