ឯកឧត្តម ស៊ូនី វង្សវិសិដ្ឋ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាភិបាលរបស់មូលនិធិជាតិជំនួយសង្គម នាព្រឹកថ្ងៃទី២៩ ខែមករា ឆ្នាំ២០២៤ បានដឹកនាំកិច្ចប្រជុំក្រុមប្រឹក្សាភិបាលអាណត្តិទី១ ឆ្នាំ២០២៤។ កិច្ចប្រជុំនេះ មាន​ការ​អញ្ជើញ​ចូលរួមពីអនុប្រធាននិងសមាជិកក្រុមប្រឹក្សាភិបាល ឯកឧត្តម អគ្គនាយក អគ្គនាយករង និង​លោក លោកស្រីប្រធាននាយកដ្ឋាននៃមូលនិធិជាតិជំនួយសង្គម ដើម្បីពិនិត្យ និង​ពិភាក្សា​លើ​របៀប​វារៈសំខាន់ៗចំនួន៥ដូចខាងក្រោម៖

១- ប្រកាសសមាសភាព និងសមាជិកក្រុមប្រឹក្សាភិបាលនៃមូលនិធិជាតិជំនួយសង្គមលើកទី៣ អាណត្តិទី១ ឆ្នាំ២០២៤

២- ពិនិត្យ និងផ្តល់ការអនុម័តត្រាមូលរបស់សាខា ម.ជ.ជ. រាជធានីខេត្ត

៣- ពិនិត្យ និងផ្តល់ការអនុម័តលើប្រកាសតែងតាំងបេក្ខភាពប្រធានសាខាម.ជ.ជ. រាជធានីខេត្ត

៤- ពិនិត្យ និងផ្តល់ការអនុម័តលើការបញ្ជូនមន្ត្រីកិច្ចសន្យា និងការតម្លើង​ប្រាក់​កម្រៃ​ប្រចាំ​ខែ​របស់​បុគ្គលិកជាប់កិច្ចសន្យានៃ ម.ជ.ជ. ទាំងថ្នាក់កណ្ដាល និងសាខា ម.ជ.ជ. រាជធានីខេត្ត

៥- ពិនិត្យ និងផ្តល់ការអនុម័តលើគណៈកម្មការលទ្ធកម្ម និងអង្គភាពលទ្ធកម្ម និងគណៈ​កម្មការ​បញ្ជី​សារពើភ័ណ្ឌទ្រព្យសម្បត្តិរដ្ឋ នៃមូលនិធិជាតិជំនួយសង្គម។

សម្រាប់កិច្ចប្រជុំ​នេះ ក៏បានលើកឡើងពីលទ្ធផល ដែលមូលនិធិជាតិ​ជំនួយ​សង្គម​សម្រេចបាន​ផងដែរ​។

លទ្ធផលសម្រេចបាន ក្នុងក្របខណ្ឌកម្មវិធីជំនួយសង្គម

ក-កម្មវិធី​ឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ

គិតចាប់​ពី​ថ្ងៃទី០១ ខែមិថុនា ឆ្នាំ២០១៩ ដល់ថ្ងៃទី៣១ ខែធ្នូ ឆ្នាំ២០២៣ រដ្ឋាភិបាល​បាន​ឧបត្ថម្ភ​សា​ច់ប្រាក់ជូនស្រ្តីមានផ្ទៃពោះសរុបចំនួន ២៣៣ ៨០៩នាក់ និងកុមារអាយុក្រោម២ឆ្នាំចំនួន ១១៩ ៧៩២នាក់ ដែលមានថវិកាចំណាយសរុប ១២៤ ៤៥៦ ០៤០ ០០០រៀល ស្មើនឹង ៣១ ១១៤ ០១០ ដុល្លារ។

ខ-កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩

គិតចាប់​ពីថ្ងៃទី២៥ ខែមិថុនា ឆ្នាំ២០២០ ដល់ថ្ងៃទី២៤ ខែធ្នូ ឆ្នាំ២០២៣ រដ្ឋាភិបាលបា​ន​ឧបត្ថម្ភ​សាច់​ប្រាក់​ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ដល់គ្រួសារ​សរុប​ចំនួន ៧០៥ ៧១៦ និងថវិកាសរុបចំនួន ៥ ០៩៩ ៨០៤ ២២៥ ០០០ រៀល។

គ-កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យក្នុងអំឡុងពេលមានសម្ពាធអតិផរណា

កាលពី​ថ្ងៃទី១០ ខែធ្នូ និងថ្ងៃទី១០ ខែមីនា ឆ្នាំ២០២៣។ ប្រមាណជិត៥០០០គ្រួសារ សរុបថវិកា ១៧៥ ៩៥២ ៨៣៦ ០០០រៀល។

ឃ-កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ដែលរង​ផល​ប៉ះពាល់​ធ្ងន់​ធ្ងរ​ពី​គ្រោះទឹ​ក​ជំនន់ប្រមាណ ៩៩១៦៩គ្រួសារ ជាទឹកប្រាក់ចំណាយសរុប៤៦ ៧៩៩ ០៨៨ ០០០រៀល។

លទ្ធផលសម្រេចបាន ក្នុងក្របខណ្ឌរបបសន្តិសុខសង្គម

គិតត្រឹម​បំណាច់​ឆ្នាំ២០២៣នេះ មូលនិធិជាតិជំនួយសង្គម បានបើកផ្តល់របបសន្តិសុខសង្គមជូន

និវត្តជន​ដែលជាអតីតមន្ត្រីរាជការស៊ីវិលតាមប្រព័ន្ធធនាគារ ប្រមាណជាង៥ពាក់នាក់ និង អតីតយុទ្ធ​ជន​ជាង៤ម៉ឺននាក់ ព្រមទាំងជនបាត់បង់សម្បទាវិជ្ជាជីវៈ ជនបាត់បង់​សមត្ថភាព​ពលកម្ម ជនពលី និងសមាជិកគ្រួសារក្នុងបន្ទុក។