អ៊ីរ៉ង់ បានជំរុញឲ្យសហរដ្ឋអាមេរិកប្រើការទូត ដើម្បីបន្ធូរបន្ថយភាពតានតឹង នៅមជ្ឈិមបូព៌ា ខណៈដែលក្រុងតេអេរ៉ង់ត្រៀមការឆ្លើយតបផ្នែកយោធាចំពោះការវាយប្រហារដ៏សាហាវលើមូលដ្ឋានទ័ពអាមេរិកកាលពីចុងសប្តាហ៍។

រដ្ឋមន្ត្រីការបរទេសនៃសាធារណរដ្ឋអ៊ីស្លាម បាននិយាយថា ការទូត «ដ៏សកម្ម» កំពុងដំណើរការ ដើម្បីស្វែងរកដំណោះស្រាយនយោបាយចំពោះសង្គ្រាមនៅហ្កាហ្សា និងការដួលរលំក្នុងតំបន់ ដោយមិនបានបញ្ជាក់លម្អិតឡើយ។

រដ្ឋមន្ត្រីការបរទេសអ៊ីរ៉ង់ លោកហ៊ូសេន អាមីរ៉ាប់ឌូឡាហៀន (Hossein Amirabdollahian) បាននិយាយនៅក្នុងសារបង្ហោះនៅលើបណ្តាញសង្គម Xថា៖«សេតវិមានដឹងយ៉ាងច្បាស់ថា វិធីដើម្បីបញ្ចប់សង្រ្គាម និងវិបត្តិបច្ចុប្បន្ន នៅក្នុងតំបន់ គឺនយោបាយ»។ ការអត្ថាធិប្បាយនេះ កើតឡើង នៅពេលដែលសហរដ្ឋអាមេរិកថ្លឹងថ្លែងពីរបៀបសងសឹកប្រឆាំងនឹងការវាយប្រហារដ៏សាហាវទៅលើមូលដ្ឋាននៅហ្ស៊កដានី ដែលបានសម្លាប់ទាហានអាមេរិកបីនាក់ និងរាប់សិបនាក់រងរបួស។ លោកប្រធានាធិបតី ចូ បៃដិន បានស្តីបន្ទោសក្រុមជីវពលដែលគាំទ្រដោយទីក្រុងតេអេរ៉ង់នៅក្នុងប្រទេសស៊ីរី និងអ៊ីរ៉ាក់ជិតខាង ហើយបាននិយាយថា លោកនឹងឆ្លើយតប «នៅពេលមួយ និងក្នុងលក្ខណៈនៃការជ្រើសរើសរបស់យើង»។

ចំណែកអ៊ីរ៉ង់បានបដិសេធការជាប់ពាក់ព័ន្ធក្នុងការវាយប្រហារនេះ ដែលជាការសម្លាប់ជនជាតិអាមេរិកដំបូងគេចាប់តាំងពីការផ្ទុះឡើងនៃសង្រ្គាមអ៊ីស្រាអែល និងក្រុមហាម៉ាស នៅតំបន់ហ្កាហ្សា ក្នុងខែតុលា។