ភាគហ៊ុនអាស៊ីបានធ្លាក់ចុះ នៅថ្ងៃអង្គារ (ទី៣០ ខែមករា) ដែលរងផលប៉ះពាល់ដោយសារការបង្គាប់បញ្ជារបស់តុលាការឲ្យក្រុមហ៊ុនអចលនទ្រព្យលំដាប់យក្ស Evergrande របស់ប្រទេសចិន ជម្រះបញ្ជីបំណុល ខណៈពេលដែលការកើនឡើងនូវភាពតានតឹងផ្នែកភូមិសាស្ត្រនយោបាយ បានជំរុញឲ្យតម្លៃប្រេងឡើងថ្លៃ និងបន្តគ្របលើកម្រិតហានិភ័យ នៅមុនកិច្ចប្រជុំរបស់ធនាគារកណ្ដាលអាមេរិក (Fed) ។

របៀបដែលដីកាបង្គាប់តុលាការឲ្យក្រុមហ៊ុន Evergrande Group ជម្រះបញ្ជីបំណុល នឹងកើតមានឡើង ហើយផលប៉ះពាល់របស់វាទៅលើទីផ្សារអចលនទ្រព្យដ៏ផុយស្រួយរបស់ប្រទេស កំពុងធ្វើឲ្យអ្នកវិនិយោគព្រួយបារម្ភ។

ទោះបីជាសន្ទស្សន៍ហ៊ុន Hang Seng របស់ទីក្រុងហុងកុងបានហក់ឡើង កាលពីថ្ងៃចន្ទ (ទី២៩ ខែមករា) ដែលឡើងដោយសារភាគហ៊ុនថាមពលក៏ដោយ ក៏នៅថ្ងៃអង្គារនេះ ហ៊ុនបានធ្លាក់ចុះ ១,៤ភាគរយ ហើយត្រៀមនឹងធ្លាក់ដល់ ៧ភាគរយ នៅក្នុងខែមករា។ សន្ទស្សន៍ហ៊ុនអចលនទ្រព្យរបស់ចិនដីគោក Hang Seng ដែលចុះបញ្ជីនៅទីក្រុងហុងកុង បានធ្លាក់ចុះ ៣ភាគរយ។

សន្ទស្សន៍ហ៊ុន Shanghai Composite បានចាប់ផ្តើមធ្លាក់ចុះនៅកម្រិត ២.៨៦៦,២៨ពិន្ទុ ដោយធ្លាក់ចុះ ១៧,០៨ពិន្ទុ ឬ ០,៥៩ភាគរយ នៅថ្ងៃអង្គារនេះ៕