រុស្ស៊ី៖ មាន​វ៉ាក់សាំង​បង្ការ​ជំងឺ COVID-19 ដែល​អាច​ប្រើប្រាស់​បាន​ចំនួន​ ៣​ប្រភេទ​នៅ​ក្នុង​ប្រទេស​រុស្ស៊ី ប៉ុន្តែ​ពលរដ្ឋ​រុស្ស៊ី​ភាគច្រើន​និយាយ​ថា ​ពួកគេ​នឹង​មិន​ទៅ​ចាក់​វ៉ាក់សាំង​ទេ ព្រោះ​ពួកគេ​មិន​ជឿ​ជាក់​លើ​វ៉ាក់សាំង​ដែល​ផលិត​នៅ​ក្នុង​ប្រទេស​ខ្លួន​។​

​ប្រទេស​រុស្ស៊ី​បាន​ប្រកាស​កាលពី​ខែ​សីហា​កន្លងទៅ​ថា ​ខ្លួន​មាន​វ៉ាក់សាំង​ផ្ទាល់ខ្លួន​ជា​លើកដំបូងដែល​មាន​ឈ្មោះថា Sputnik V ហើយ​កូនស្រី​របស់​លោក​ប្រធានាធិបតី Vladimir Putin ត្រូវ​បាន​ចាក់​វ៉ាក់សាំង​នេះ​។​ ក្រុម​អ្នកស្រាវជ្រាវ​បាន​រក​ឃើញ​ថា វ៉ាក់សាំង Sputnik V ដែល​កំពុង​ត្រូវ​បាន​ប្រើ​ប្រាស់​នៅ​ក្នុង​ប្រទេស​ប្រេ​ស៊ី​ល និង​ទួរគី​ដែរ​នោះ​គឺ​មាន​ប្រសិទ្ធភាព ​៩១%។ ទោះបី​មាន​ជម្រើស​ច្រើន​ក្នុង​ការ​ចាក់​វ៉ាក់សាំង​ក្ដី តែ​មានតែ ​១៤% ប៉ុណ្ណោះ​នៃ​ប្រជាពលរដ្ឋ​សរុប​ចំនួន ​១៤៦​លាន​នាក់​របស់​ប្រទេស​រុស្ស៊ី​ ត្រូវ​បាន​ចាក់​វ៉ាក់សាំង​យ៉ាងហោចណាស់​មួយ​ដូ​ស ហើយ​រដ្ឋាភិបាល​នឹង​មិន​អាច​សម្រេច​បាន​តា​ម​ផែនការ ​ដែល​នឹង​ចាក់​ជូន​ពលរដ្ឋ​រុស្ស៊ី​ឲ្យ​បាន​ចំនួន ​៣០​លាន​នាក់នៅ​ខែ​មិថុនា​នេះ​នោះ​ទេ​។

​អ្នកក្រុង​មូស្គូ វ័យ ​២៩​ឆ្នាំ លោក សាមី អូ​នូ​សេវ បាន​ប្រាប់​សារព័ត៌មាន NBC ថា លោក​ជឿ​ថា​ វ៉ាក់​សាំង​បង្ការ​ជំងឺ COVID-19 គឺ​ចាំបាច់​ណាស់ ប៉ុន្តែ​លោក​នឹង​មិន​ចាក់​វ៉ាក់សាំង​ដែល​ផលិត​ក្នុង​ប្រទេស​រុស្ស៊ី​ទេ។ ​លោក​ថា ប្រសិនបើ​លោក​មាន​ជម្រើស លោក​នឹង​មិន​ចាក់​ទេ។ លោក​គិត​ថា វ៉ាក់សាំង​មាន​អត្រា​ប្រសិទ្ធភាព​ទាប​គឺជា​កំហុស​ដ៏​ធំ​របស់​រដ្ឋាភិបាល ដែល​ធ្វើ​ឲ្យ​ពលរដ្ឋ​គ្មាន​ទំនុក​ចិត្ត​។​ គិត​ត្រឹម​ព្រឹក​ថ្ងៃ​អង្គារ​នេះ រុស្ស៊ី​មាន​ករណី​ឆ្លង​វីរុស ​COVID-19 ចំនួន ៥,៤៧២,​៩​៤១​នាក់ និង​ស្លាប់​ចំនួន ១៣៣,៨៩៣​នាក់​៕

អត្ថបទ៖ សុខមាន